بيىلعى 2025 جىلدى ەل پرەزيدەنتى ق.ج.توقايەۆ «جۇمىسشى ماماندىقتار جىلى» دەپ جاريالاۋى ءبىزدىڭ سالامىزدى ودان ءارى جانداندىرىپ، بولاشاق اۆتوكولىك شەبەرلەرىن دايىنداۋ قىزمەتىمىزگە تىڭ سەرپىن بەرۋدە. جالپى، جۇمىسشى ماماندىقتارىنا سۇرانىس وتە جوعارى بولعانىمەن، كەيدە وسى سالانىڭ ماماندارى ەلەۋسىز قالاتىنى دا جاسىرىن ەمەس. پرەزيدەنتىمىز قولداپ تۇرعاندا، كاسىبي ءبىلىمنىڭ كوكجيەگىن كەڭەيتىپ، جۇمىسشى ماماندىعىن تاڭداعان جاستارىمىزدى باسەكەگە قابىلەتتى، ەل يگىلىگىنە قىزمەت ەتەر ناعىز مامان ەتىپ شىعارۋ ءبىزدىڭ قۇزىرىمىزدا.
مەن اۆتوكولىك سالاسىنىڭ مامانى رەتىندە 2018 جىلدان بەرى الماتى ەلەكترومەحانيكا كوللەدجىندە وندىرىستىك وقىتۋ شەبەرى، شەبەرحانا مەڭگەرۋشىسى، قازىرگى تاڭدا اعا شەبەر قىزمەتىن اتقارىپ كەلەمىن. ۇستازدىق جولىمدا ۇنەمى ىزدەنىس ۇستىندە ءجۇرىپ، الدىما كەلگەن شاكىرتتەرىمە زامان تالابىنا ساي ساپالى ءبىلىم بەرىپ، بولاشاقتا ءوز ءىسىنىڭ مايتالمان مامانى، باسەكەگە قابىلەتتى كاسىپ يەسى بولۋىنا بار كۇشىمدى، تاجىريبەمدى جۇمساۋدامىن. ءبىلىم الۋشىلاردى كوللەدجىشىلىك، قالالىق، رەسپۋبليكالىق بىرنەشە كاسىبي بايقاۋلارعا قاتىستىرىپ، ءوزىم دە كاسىبي بىلىگىمدى شىڭداۋ ماقساتىندا قالالىق WorldSkills كاسىبي بايقۋلارىندا ساراپشى قىزمەتىن اتقارىپ ءجۇرمىن. مۇنداي تاجىريبەلەر مامانداردى شىڭداپ، ءوز سالاسىنىڭ قىرى-سىرىن بىلە تۇسۋىنە زور مۇمكىندىك بەرەدى.
وسىنداي ۇلكەن تاجىريبەنىڭ ءبىرى ارىپتەستەرىممەن بىرگە 2023 جىلى «الماتى قالاسىنىڭ ءبىلىم بەرۋ جۇيەسىن دامىتۋداعى 2023-2030 جىلدارعا ارنالعان وڭىرلىك جول كارتاسى» نەگىزىندە گەرمانيا ەلىندە تاعىلىمدامادان وتكەنىم بولدى. گەرمانيا – اۆتوكولىك ءوندىرىسى مەن ينجەنەريا سالاسىندا كوشباسشى ەلدەردىڭ ءبىرى. بۇل ەلدەگى تەحنيكالىق ءبىلىم بەرۋ جۇيەسى تەوريا مەن پراكتيكانى ۇشتاستىرا وتىرىپ، بولاشاق مامانداردىڭ جوعارى دەڭگەيدە دايارلانۋىنا باسىمدىق بەرەدى.
بۇل ساپارىمىزدا ءبىز زاماناۋي اۆتوكولىك تەحنولوگيالارى مەن قىزمەت كورسەتۋ ستاندارتتارىن مەڭگەرىپ، شەت ەلدىك تاجىريبەنى زەرتتەپ، ەۋروپالىق ستاندارتتى قازاقستانداعى تەحنيكالىق ءبىلىم بەرۋ جۇيەسىنە ەنگىزۋگە مۇمكىندىك الدىق. تاعىلىمداما بارىسىندا جەتەكشى اۆتوكولىك كومپانيالارىندا تاجىريبە جيناقتاپ، اۆتوموبيل دياگنوستيكاسى، جوندەۋ جانە تەحنيكالىق قىزمەت كورسەتۋ ادىستەرى بويىنشا ءبىلىمىمدى جەتىلدىردىم. شەتەلدىك ساپاردان ورالعان سوڭ، قالالىق دەڭگەيدە ارىپتەستەرىمىزگە تاجىريبەمىزدى ءبولىسىپ، كوللەدجدە وقىتۋ پروسەسىنە جاڭا ادىستەر ەنگىزىپ، زاماناۋي اۆتوكولىك شەبەرحاناسىن جابدىقتاۋعا ات سالىسۋدامىز.
گەرمانياداعى ىس-تاجىريبەمدى ارىپتەستەرىم اسگات رايحان، بۇلبۇل مۋنبايەۆامەن بىرگە «تەحنيكالىق جانە كاسىپتىك ءبىلىم بەرۋ جۇيەسىندەگى يننوۆاسيالار: سىن تەگەۋرىندەر مەن پەرسپەكتيۆالار» تاقىرىبىنداعى
حالىقارالىق پەداگوگيكالىق وقۋلاردا قورعاپ شىعىپ، جۇلدەلى ءى ورىنعا يە بولدىق. بۇل كوللەدجىمىز ءۇشىن دە، ءوزىمىز ءۇشىن دە ۇلكەن جەتىستىك دەپ سانايمىن. الداعى ۋاقىتتا دا، زاماناۋي ءبىلىمنىڭ ارقاسىندا ماقساتتارىمىزعا قول جەتكىزىپ، تالاي شىڭداردى باعىندىراتىنىمىزعا سەنىمدىمىن!