ونىڭ ايتۋىنشا، جالپى ەكسپورت قۇرىلىمىندا شيكىزاتتىق ەمەس ەكسپورتتىڭ ۇلەسى 35%-عا جەتتى. ماسەلەن، بىلتىر جانە بيىلدىڭ العاشقى ەكى ايىندا قازاقستان قايتا وڭدەۋ، ماشينا جاساۋ، حيميا ونەركاسىبى جانە تاماق ونەركاسىبى ونىمدەرىن بەلسەندى ەكسپورتتادى.
«2024 جىلى ەكسپورتتىڭ ەڭ جوعارى ءوسىمىن مەتاللۋرگيا سالاسى كورسەتتى. ونىڭ كولەمى 16،9 ملرد اقش دوللارىن قۇرادى، بۇل قازاقستاندىق مەتالل ونىمدەرىنىڭ سىرتقى نارىقتاعى جوعارى باسەكەگە قابىلەتتى ەكەنىن كورسەتەدى. سونىمەن قاتار قازاقستان ازىق-تۇلىكتىڭ سەنىمدى جەتكىزۋشىسى رەتىندە، اسىرەسە، كورشى ەلدەر، ونىڭ ىشىندە وزبەكستان، قىرعىزستان، اۋعانستان، تاجىكستان ەلدەرى جانە تاياۋ شىعىس نارىقتارىندا ءوز پوزيسياسىن نىعايتۋدى جالعاستىرۋدا. تاماق ونىمدەرىنىڭ ەكسپورتى 2،8 ملرد اقش دوللارىن قۇرادى. ماشينا جاساۋ كورسەتكىشىنە كەلەتىن بولساق، ول 2024 جىلى 2،2 ملرد اقش دوللارىن قۇرادى. بۇل ونەركاسىپتىڭ تەحنولوگيالىق قايتا باعدارلانۋىنىڭ جانە كۇردەلى جابدىقتار لوكاليزاسياسىنىڭ ءوسۋى تۋرالى جاقسى كورسەتكىش»، – دەدى سپيكەر.
سونداي-اق حيميا ونەركاسىبى مەن مۇناي-حيميا ەكسپورتىنىڭ ايتارلىقتاي ءوسۋى بايقالادى، ولاردىڭ ەكسپورتى تيىسىنشە 1،9 جانە 1،5 ملرد اقش دوللاردى قۇرادى. وسىلايشا، 2024 جىلى شيكىزاتتىق ەمەس تاۋارلاردىڭ ەكسپورتى قازاقستاندا يندۋستريالاندىرۋ مەن قايتا وڭدەۋدى دامىتۋدىڭ ستراتەگيالىق ماقساتتارىنا سايكەس كەلەتىن وڭدەۋ سەكتورلارىندا تۇراقتى وسۋمەن سيپاتتالدى. ەلىمىزدىڭ شيكىزاتتىق ەمەس تاۋارلار ەكسپورتىنداعى ساۋدا سەرىكتەستەرى اراسىندا رەسەي فەدەراسياسى، جۇڭگو تۇركيا، وزبەكستان، قىرعىزستان ەلدەرى بار. 2024 جىلى قازاقستان العاش رەت ماۆريتانيا، لاوس، يامايكا، گابون جانە زيمبابۆەگە ءوز تاۋارلارىن ەكسپورتتاي باستادى.
سونداي-اق ق ر ەلشىلىكتەرى جانىنان ءسيم-نىڭ تۇركيا، جۇڭگو، بىرىككەن اراب امىرلىكتەرى، ءۇندىستان جانە يرانداعى ساۋدا وكىلدەرى تاعايىندالدى. باستى ساۋدا سەرىكتەستەرىنىڭ ءبىرى بولىپ تابىلاتىن جۇڭگو حالىق رەسپۋبليكاسىنىڭ نارىعىنا ەرەكشە نازار اۋدارىلادى. وسىلايشا، QazTrade ءۇرىمشى قالاسىندا وكىلدىك اشتى.
سپيكەر قازاقستاننىڭ ايتارلىقتاي لوگيستيكالىق مۇمكىندىكتەرىن دە اتاپ ءوتتى. سيم يندۋستريالىق جانە ارنايى ەكونوميكالىق ايماقتار نىسانىندا ترانسشەكارالىق حابتاردى قۇرۋ جانە دامىتۋ بويىنشا جۇمىس جۇرگىزۋدە: جەتىسۋ وبلىسىنداعى قورعاس تورابى، ماڭعىستاۋ وبلىسىنداعى كاسپيي تورابى، باتىس قازاقستان وبلىسىنداعى ەۋرازيا، تۇركىستان وبلىسىنداعى «ورتالىق ازيا» حالىقارالىق ونەركاسىپتىك كووپەراسيا ورتالىعى جانە جامبىل وبلىسىنداعى «الاتاۋ» يندۋستريالىق ساۋدا-لوگيستيكالىق كەشەنى.
«ونەركاسىپتىك ساياسات تۋرالى» زاڭعا سايكەس سيم شيكىزاتتىق ەمەس ەكسپورتتى دامىتۋ جانە ىلگەرىلەتۋ ماقساتىندا ۇلتتىق دامۋ ينستيتۋتتارىمەن بىرلەسىپ، شيكىزاتتىق ەمەس تاۋارلار مەن قىزمەتتەردى وتاندىق وندىرۋشىلەرگە سەرۆيستىك، قارجىلىق جانە قارجىلىق ەمەس قولداۋ شارالارىن ۇسىنادى.