ۇلتتىق قاۋىپسىزدىك كوميتەتى (ۇقك) حابارلاۋىنشا كارىم ءماسىموۆ 2024 جىلدىڭ ناۋرىز ايىندا قازاقستان رەسپۋبليكاسىنىڭ پرەزيدەنتىنە كەشىرىم جاساۋ تۋرالى ءوتىنىش ءجىبەرگەن، دەپ حابارلايدى almaty-akshamy.kz
ۇقك ءمالىمدەۋىنشە، ءماسىموۆ قازىرگى تاڭدا استاناداعى ۇقك تەرگەۋ يزولياتورىندا قاماۋدا وتىر. كوميتەتتىڭ رەسمي حابارلاماسىندا:
"2024 جىلدىڭ ناۋرىز ايىندا ول وسى مەكەمەدەن قازاقستان رەسپۋبليكاسى پرەزيدەنتىنىڭ اتىنا راقىمشىلىق الۋ جونىندە ءوتىنىش جولداعان،" - دەلىنگەن.
كارىم ماسىموۆكە قاتىستى قىلمىستىق ىستەر 218-باپتىڭ 3-بولىگىنىڭ 3-تارماعى («قىلمىستىق جولمەن الىنعان اقشانى جانە وزگە دە مۇلىكتى زاڭداستىرۋ») جانە 366-باپتىڭ 4-بولىگى («اسا ءىرى كولەمدە پارا الۋ») بويىنشا سوتقا دەيىنگى تەرگەۋ جالعاسۋدا.
2023 جىلدىڭ ءساۋىر ايىندا سوت ۇلتتىق قاۋىپسىزدىك كوميتەتىنىڭ بۇرىنعى ءتوراعاسى كارىم ءماسىموۆ پەن ونىڭ ورىنباسارلارىنا قاتىستى ۇكىم شىعاردى. ءماسىموۆ مەملەكەتكە وپاسىزدىق جاسادى، بيلىكتى باسىپ الۋدى ناسيحاتتادى جانە بيلىكتى اسىرا پايدالاندى دەپ تانىلدى. سوت ۇكىمى بويىنشا ءماسىموۆ مۇلكى تاركىلەنىپ، 18 جىلعا باس بوستاندىعىنان ايىرىلدى جانە ءومىر بويىنا مەملەكەتتىك قىزمەتتە لاۋازىمداردى اتقارۋ قۇقىعىنان ايىرىلدى.
ونىڭ ورىنباسارلارى سادىقۇلوۆ 16 جىلعا، ەرعوجين جانە وسيپوۆ 15 جانە 3 جىلعا باس بوستاندىعىنان ايىرىلدى. تورتەۋى دە ارنايى اتاقتارى مەن مەملەكەتتىك ناگرادالارىنان ايىرىلدى. مەملەكەتكە 10 ميلليارد تەڭگە جانە 24 ميلليون دوللار ءوندىرىلدى.
ەستەرىڭىزگە سالا كەتەيىك، 2022 جىلدىڭ 6 قاڭتارىندا كارىم ءماسىموۆ مەملەكەتكە وپاسىزدىق جاسادى دەگەن كۇدىكپەن ۇستالعان بولاتىن. قاڭتار ايىنىڭ سوڭىندا ۇقك باسپا ءسوز قىزمەتى ءماسىموۆ پەن ونىڭ ورىنباسارلارىنىڭ ءىسى قۇپيا بولىپ، سوت ولاردى قاماۋعا الۋعا سانكسيا بەرگەنىن حابارلادى. 10 ناۋرىزدا ماسىموۆتەن تاركىلەنگەن ميلليوندار، ءزاۋلىم ۇيلەر مەن قىمبات كولىكتەر تۋرالى اقپارات جاريالاندى.