بۇل ساۋالعا كولىك مينيسترلىگىنىڭ باسشىسى مارات قارابايەۆ جاۋاپ بەردى.
كولىك مينيسترلىگىنىڭ باسشىسى استانا قالاسىنىڭ تۇرعىندارىمەن كەزدەسىپ، ازاماتتاردى جەكە قابىلدادى. مينيسترگە ەلورداداعى قوعامدىق كولىك جەلىسىن دامىتۋ، اۆتوبۋستاردا جول اقىسىن تولەۋ جۇيەلەرى، جۇك تاسىمالى جانە كولىك ينسپەكسيالارىنىڭ قىزمەتىنە قاتىستى سۇراقتار قويىلدى. سونداي-اق كولىك كومپانيالارىنىڭ وكىلدەرى كولىك قۇرالدارىنىڭ رۇقسات ەتىلگەن سالماعىنىڭ ارتۋىن باقىلاۋدى قامتاماسىز ەتۋ سالاسىنداعى مەملەكەتتىك ساياساتپەن كەلىسپەيتىندىكتەرىن ايتىپ جەتكىزدى، دەپ حابارلايدى Almaty-akshamy.kz cالا مينيسترلىگىنە سىلتەمە جاساپ.
ءسوز كەزەگىندە مارات قارابايەۆ مينيسترلىك ءوز تاراپىنان كولىكتىك باقىلاۋ ينسپەكتورلارىنىڭ جۇمىسىنداعى سىبايلاس جەمقورلىق تاۋەكەلدەرىن جويۋعا جانە ۇستەمە باقىلاۋ تيىمدىلىگىن ارتتىرۋعا باعىتتالعان ءبىرقاتار قوسىمشا شارانى ەنگىزىپ جاتقانىن حابارلادى.
«ەگەر جۇك كولىگىنىڭ يەلەرى زاڭناما تالاپتارىن ساقتاسا، دۇرىس بولار ەدى. الايدا، تالاپتار ءجيى بۇزىلىپ تۇرادى. ناتيجەسىندە بۇل بيۋدجەتكە وراسان زور زيان كەلتىرەدى. ماسەلەن، باتىس قازاقستان وبلىسىندا جولدىڭ قۇرىلىسىنا كىرىستىرىلگەن اۋىر جۇك كولىكتەرى جاڭا جولداردى قالاي بۇزعانىن كورىپ وتىرمىز»، – دەدى كولىك سالاسىنا جاۋاپتى مينيستر.
قوردالانعان ماسەلەنى شەشۋ ءۇشىن مينيسترلىك 2024 جىلى قالالاردىڭ كىرىس جانە شىعىس بولىكتەرىنە بەينەكامەرالار ورناتۋدى باستايدى. ولار اۆتوماتتى تۇردە ارتىق سالماق ءۇشىن ايىپپۇل سالادى. سونىمەن بىرگە 220 كامەرانى «سەرگەك» بەينەباقىلاۋ جۇيەسىمەن بىرىكتىرۋ جوسپارلانىپ وتىر.
سونداي-اق ق ر كولىك مينيسترلىگى بولىنبەيتىن ءىرى كولەمدى جۇكتەردى تاسىمالداۋعا رەسمي ارنايى رۇقساتتار بەرۋ جانە ساموسۆالداردىڭ جولدارمەن قوزعالىسىن شەكتەۋ تەتىكتەرى پىسىقتالۋدا.
«الەمنىڭ كەز كەلگەن جەرىندە كارەرلىك اۋىر جۇك كولىكتەرىنىڭ جالپىعا ورتاق پايدالانىلاتىن اۆتوجولدارمەن جۇرۋىنە تىيىم سالىنادى. قازاقستان، بالكىم، مۇندايعا جول بەرگەن جالعىز ەل. ءبىز اتالعان شەكتەۋلەردى 2023 جىلدان باستاپ ىسكە قوسقىمىز كەلدى. دەي تۇرعانمەن، نارىق قاتىسۋشىلارى از دا بولسا ۋاقىت بەرۋدى سۇراعان بولاتىن. سوندىقتان اۋىر كارەرلىك جۇك كولىكتەرىنە 2025 جىلدىڭ اياعى مەن 2026 جىلدىڭ باسىندا قازاقستاندىق جولدارمەن جۇرۋىنە تىيىم سالىنادى»، – دەپ اتاپ ءوتتى مارات قارابايەۆ.
سونىمەن قاتار ەگەر مينيسترلىكتىڭ ۇسىنىسى ۇكىمەت پەن پارلامەنتتە قولداۋ تاپسا، تاسىمالداۋشىلار تولەۋگە ءتيىستى ارنايى رۇقساتى بولعان كەزدە بەلگىلى ءبىر شەگىنە دەيىن ارتىق جۇكتەردى تاسىمالداۋعا مۇمكىندىك بەرەتىن نورما ەنگىزىلەدى. اتالعان شەشىم جەرگىلىكتى جەرلەر ورىن الۋى مۇمكىن سىبايلاس جەمقورلىق تاۋەكەلدەرىن جويۋدى كوزدەيدى.
ءداستۇر بويىنشا تۇرعىندارمەن كەزدەسۋدەن كەيىن كولىك مينيسترلىگىنىڭ باسشىسى ەلوردا ازاماتتارىن جەكە ماسەلەلەرى بويىنشا قابىلدادى. كۇن تارتىبىندە سولتۇستىك قازاقستان وبلىسىنداعى «كوكتەرەك-توسپا-جاسقايرات-قايرات» اۆتوجولىن ورتاشا جوندەۋ بويىنشا مەملەكەتتىك ساتىپ الۋ تۋرالى شارتتىڭ جۇزەگە اسىرىلۋى، الماتى-ەكاتەرينبۋرگ تراسساسىن جارىقتاندىرۋ، اۆتوبۋس ايالدامالارىن ورناتۋ، زاڭسىز تاسىمالداۋشىلاردىڭ قىزمەتى جانە كەمەلەردىڭ تەحنيكالىق قاۋىپسىزدىگىن قامتاماسىز ەتۋ ماسەلەلەرى قارالدى.
بارلىق كەلىپ تۇسكەن وتىنىشكە مارات قارابايەۆ تولىققاندى جاۋاپ بەردى. كەيبىر ماسەلەلەر ءمينيستردىڭ جەكە باقىلاۋىنا الىنىپ، كوميتەتتەر مەن قۇرىلىمدىق بولىمشەلەردىڭ باسشىلارىنا ءتيىستى تاپسىرمالار بەرىلدى.