بۇل جۇرەكتىڭ ىرعاعى مەن وتكىزگىشتىگىنىڭ بۇزىلۋىن ەمدەۋدە جاڭا ءداۋىردى بىلدىرەتىن كارديوستيمۋلياسيا تەحنولوگياسىنىڭ دامۋىنداعى ماركەر
كارديولوگيا جانە ىشكى اۋرۋلار عزي-دا 76 جاستاعى پاسيەنتكە العاش رەت Micra ەلەكترودسىز كارديوستيمۋلياتورى يمپلانتتالدى، دەپ حابارلايدى اlmaty-akshamy.kz.
"بۇعان دەيىن پاسيەنتكە 2016 جىلى قاراپايىم ەلەكتروكارديوستيمۋلياتور قويىلعان، ءبىراق ونىڭ قابىلدانباۋى بىرنەشە جىلدان كەيىن بولعان. ءبىزدىڭ اريتمولوگتار ەلەكترودسىز كارديوستيمۋلياتوردى العاشقى يمپلانتتاۋدى ا. سىزعانوۆ اتىنداعى ۇعحو رەنتگەنحيرۋرگيا، ينتەرۆەنسيالىق كارديولوگيا جانە اريتمولوگيا بولىمشەسىنىڭ مەڭگەرۋشىسى ءادىل بايىمبەتوۆتىڭ باسشىلىعىمەن جۇرگىزدى. كەلەسى وپەراسيالاردى ءوز بەتىنشە جۇرگىزەتىن بولامىز"، - دەپ ءبولىستى باسقارما باسشىسى مارات پاشيموۆ.
كلينيكانىڭ اريتمولوگيالىق قىزمەتىنىڭ اعا رەزيدەنتى ارتۋر ءابدىمومىنوۆتىڭ ايتۋىنشا، Micra - بۇل بەلگىلى ءبىر سەبەپتەرمەن كادىمگى كارديوستيمۋلياتوردى ورناتۋ مۇمكىن ەمەس وتكىزگىشتىك بۇزىلىستارى بار پاسيەنتتەر ءۇشىن جاڭا مۇمكىندىكتەر اشقان ريەۆوليۋسيالىق قۇرىلعى. Micra كارديوستيمۋلياتورى ءداستۇرلى مودەلدەردە ءجيى قولدانىلاتىن سىمداردى قاجەت ەتپەيدى. ول از ءينۆازيۆتى ەم شارالار ارقىلى تىكەلەي جۇرەككە يمپلانتتالادى، بۇل ونى پاسيەنت ءۇشىن ءقاۋىپسىز جانە ىڭعايلى ەتەدى.
"Micra شاعىن ولشەمدى، بۇل ونى تىكەلەي جۇرەك قۋىسىنا ورنالاستىرۋعا مۇمكىندىك بەرەدى. جەتىلدىرىلگەن تەحنولوگيالار مەن بيوسەنسورلاردىڭ كومەگىمەن قۇرىلعى قاجەتتى ەلەكترلىك يمپۋلستاردى قامتاماسىز ەتە وتىرىپ، جۇرەكتىڭ جۇمىسىن ىنتالاندىرادى. Micra-نىڭ باستى ارتىقشىلىقتارىنىڭ ءبىرى - ونىڭ ۇزاق قىزمەت ەتۋ مەرزىمى. باتارەيانىڭ جاڭا بۋىنى قۇرىلعىنىڭ 12 جىلعا دەيىن جۇمىس ىستەۋىنە مۇمكىندىك بەرەدى. سونداي-اق، Micra ەلەكترودتاردى وتكىزۋمەن بايلانىستى اسقىنۋلاردىڭ ءقاۋپىن ايتارلىقتاي تومەندەتەتىنىن جانە ولاردىڭ زاقىمدانۋ نەمەسە ينفەكسيا مۇمكىندىگىن بولدىرمايتىنىن اتاپ وتكەن ءجون"، - دەپ اتاپ ءوتتى جۇرەك ىرعاعى مەن وتكىزگىشتىگىنىڭ بۇزىلۋى بولىمشەسىنىڭ مەڭگەرۋشىسى باعدات احىت.
كارديولوگيا جانە ىشكى اۋرۋلار عزي ۋاقىتپەن قاتار جۇرەتىن جانە ينستيتۋت پاسيەنتتەرىنىڭ دەنساۋلىق جاعدايىن جانە ولاردىڭ ءومىر ءسۇرۋ ساپاسىن ەداۋىر جاقسارتۋعا مۇمكىندىك بەرەتىن وزىق ەمدەۋ ادىستەرىن قولداناتىن جەتەكشى كلينيكا رەتىندەگى بەدەلىن تاعى دا راستايتىنى قۋانتادى.
اپپاراتتى يمپلانتاتتاۋ بويىنشا قىمبات وپەراسيا پاسيەنتكە ءمامس قاراجاتى ەسەبىنەن تولىعىمەن تەگىن جۇرگىزىلدى.