عۇسمان قىرعىزبايەۆ پەن ونىڭ ەگىز باۋىرى عۇمارعا مەرزىمىنەن بۇرىن «كاپيتان» اسكەري اتاعى بەرىلدى
كوماندا قۇرامىندا قازاقستاندىق دزيۋدوشى، 2021 جىلعى الەم چەمپيوناتىنىڭ كۇمىس جۇلدەگەرى، 2019 جانە 2022 جىلدارداعى ازيا چەمپيوناتتارىنىڭ قولا جۇلدەگەرى، وليمپيادانىڭ قولا جۇلدەگەرى عۇسمان قىرعىزبايەۆ بار.
اعا لەيتەنانت عۇسمان قىرعىزبايەۆ – قورعانىس مينيسترلىگى ورتالىق سپورت كلۋبىنىڭ اسكەري قىزمەتشىسى، دەپ حابارلايدى aqshamnews.kz قورعانىس مينيسترلىگىنە سىلتەمە جاساپ.
وتان الدىنداعى ەرەكشە ەڭبەگى، دەنە تاربيەسى مەن سپورتتى دامىتۋعا قوسقان زور ۇلەسى، جوعارى جەتىستىكتەرى جانە كاسىبيلىگى ءۇشىن عۇسمانعا جانە ونىڭ ەگىز سىڭارى، ورتالىق سپورت كلۋبى دزيۋدودان كوماندانىڭ بولىمشە باستىعى - اعا جاتتىقتىرۋشىسى عۇمار قىرعىزبايەۆقا قازاقستان رەسپۋبليكاسى قورعانىس ءمينيسترىنىڭ بۇيرىعىمەن كەزەكتى «كاپيتان» اسكەري اتاعى مەرزىمىنەن بۇرىن بەرىلەدى، –دەپ اتاپ ءوتتى قورعانىس مينيسترلىگى سپورت كوميتەتىنىڭ ءتوراعاسى – ورتالىق سپورت كلۋبىنىڭ باستىعى پولكوۆنيك ارمان ابەۋوۆ.
– ونى اعايىندى ەگىزدەرگە وليمپيادا قورىتىندىسى بويىنشا سپورتشىلارعا قۇرمەت كورسەتۋ كەزىندە قورعانىس ءمينيسترى رۋسلان جاقسىلىقوۆ تاپسىراتىنىن ايتتى. وليمپيادانىڭ بارلىق جەڭىمپازدارىمەن بىرگە عۇسمان قىرعىزبايەۆتى دا الماتى گارنيزونىنىڭ اسكەري قىزمەتشىلەرى جانە ارىپتەستەرى قارسى الدى.
ەستەرىڭىزگە سالا كەتەيىك، قازاقستاندىق دزيۋدوشى عۇسمان قىرعىزبايەۆ سەربيادان كەلگەن سپورتشى ستراحينيا ءبۋنچيچتى جەڭىپ، ءۇشىنشى ورىن ءۇشىن كۇرەستە قولا مەدال جەڭىپ الدى.