مۇراجايلاردا تاقىرىپتىق ەكسكۋرسيالار وتكىزىلەدى.
مادەنيەت جانە اقپارات مينيسترلىگىنىڭ باستاماسىمەن كۇزگى كانيكۋل كەزىندە مەكتەپ وقۋشىلارىنا ءبىرقاتار تەگىن ءىس-شارالار ۇيىمداستىرىلادى، دەپ حابارلايدى aqshamnews.kz
ۇلتتىق مۋزەيدە مەكتەپ دەمالىسى كەزىندە تاريحي-مادەني مۇرانى ناسيحاتتاۋ ماقساتىندا تاقىرىپتىق تەگىن ەكسكۋرسيالار وتكىزىلەدى. ەكسكۋرسيا بارىسىندا وقۋشىلار بريتاندىق ءمۇسىنشى يۋنۋس سافاردياردىڭ تۋىندىلارى مەن وتاندىق سۋرەتشى تىلەۋجان باتانوۆتىڭ جەكە كورمەلەرىن تاماشالاي الادى.
ءابىلحان قاستەيەۆ اتىنداعى مەملەكەتتىك ونەر مۋزەيىندە «التىن كۇز» تاقىرىبىندا پلەنەر، تۇمار جاساۋ بويىنشا شەبەرلىك ساباقتارى جوسپارلانعان.
مەملەكەتتىك ورتالىق مۋزەي بالالار ءۇشىن «قازاق حاندىعىنىڭ بيلەۋشىلەرى» جوباسى اياسىندا سيكلدىك ساباقتار، «ابىلاي حان» جانە «قازاق حالىق فولكلورى: قازاق ەرتەگىلەرى الەمىندە» جوباسى اياسىندا تەاترلاندىرىلعان «الدار كوسە – مەنىڭ سۇيىكتى كەيىپكەرىم» مۋزەيلىك ساباقتارىن ۇيىمداستىرادى.
جامبىل اتىنداعى قازاق مەملەكەتتىك اكادەميالىق فيلارمونيادا «وقۋشىلارعا ارنالعان ابونومەنت» جوباسى بويىنشا ءار كونسەرتكە كىرۋ ءۇشىن مۇمكىندىگى شەكتەۋلى بالالارعا ارنايى 10 ورىن تەگىن قاراستىرىلعان.
ابايدىڭ «جيدەباي-بورىلى» مەملەكەتتىك مۋزەي-قورىعى «كۇزگى دەمالىس مۋزەي اياسىندا» اتتى اپتالىق وتكىزىپ، وقۋشىلار اراسىندا ۆيكتورينالار، «تاڭبالى» مۋزەي-قورىعى وقۋشىلار ءۇشىن قىزىقتى كۆەست-ويىن وتكىزۋدى جوسپارلاپ وتىر.
«ازىرەت سۇلتان» مەملەكەتتىك تاريحي-مادەني مۋزەي-قورىعىندا وسى جىلدىڭ قىركۇيەگىنەن باستاپ ارنايى مەكتەپ وقۋشىلارى ءۇشىن «ياساۋيتانۋ» كلۋبى مەن «جاس ارحەولوگ»، «جاس رەستاۆراتور»، «جاس ەكسكۋرسوۆود» ۇيىرمەلەرى تۇراقتى تۇردە تەگىن جۇمىس جاساپ كەلەدى.
مۋزەي پەداگوگيكاسى جوباسى بويىنشا «بوتاي» مۋزەي-قورىعىندا بالالار ءۇشىن تەگىن كورمەلەر مەن ەكسكۋرسيالار ۇيىمداستىرىلىپ، اشىق ەسىك كۇندەرى وتكىزىلەدى. سونداي-اق، ەكسكۋرسيا بارىسىندا «بوتاي مادەنيەتىنىڭ ارحەولوگيالىق زەرتتەۋلەرى» ينستاللياسياسى ۇسىنىلادى.
«ەجەلگى تاراز ەسكەرتكىشتەرى» مەملەكەتتىك تاريحي-مادەني مۋزەي-قورىعىنا قاراستى «قاراحان»، «داۋىتبەك»، «ايشا ءبيبى»، «بابادجا حاتۋن» كەسەنەلەرى، «اقىرتاس» ساۋلەت-ارحەولوگيالىق كەشەنى مەن «كونە تاراز» اشىق اسپان استىنداعى ارحەولوگيالىق ساياباعىنا بالالارعا جىل بويىنا اقىسىز كىرۋ قاراستىرىلعان.
2017 جىلدان باستاپ ءار ايدىڭ سوڭعى جەكسەنبىسىندە جانە كانيكۋل كۇندەرى مەكتەپ وقۋشىلارى ءۇشىن «ەسىك» مەملەكەتتىك تاريحي-مادەني مۋزەي-قورىعىنا تەگىن كىرە الادى. سونىمەن قاتار، ەسىك جانە الماتى قالالارىنداعى مۇگەدەك جانە كورۋ قابىلەتى ناشار بالالارعا مۋزەي-قورىققا اقىسىز كىرۋ قاراستىرىلعان.
«سارايشىق» مەملەكەتتىك تاريحي-مادەني مۋزەي-قورىعى مەكتەپ وقۋشىلارىنا ارنايى ەكسكۋرسيا ۇيىمداستىرىپ، «كۇز قىزىقتارى» شەبەرلىك ساعاتىن وتكىزەدى.
«وتىرار» مەملەكەتتىك ارحەولوگيالىق مۋزەي-قورىعى ارىستانباب كەسەنەسى، وتىرار-توبە جانە ساپار ورتالىعى عيماراتتارىنا ەكسكۋرسيالاردى تەگىن ۇيىمداستىرادى.
«ۇلىتاۋ ۇلتتىق تاريحي-مادەني جانە تابيعي مۋزەي-قورىعى» مەكتەپ وقۋشىلارىنا ارناپ «جوشى ۇلىسى: تاريحى جانە مۇراسى» تاقىرىبىندا تەگىن كورمە ۇيىمداستىرادى. كورمەدە ۇلىتاۋ وڭىرىندە ورنالاسقان التىن وردا داۋىرىنە جاتاتىن تاريح جانە مادەنيەت ەسكەرتكىشتەرى تانىستىرىلادى.