ەلىمىزدە ءقاۋىپتى كامپيتتەر ساتىلىپ جاتىر.
ەل نارىعىنا جۇرگىزىلگەن تەكسەرۋ ناتيجەسىندە ايگىلى برەندتەردىڭ اتاۋىندا ءبىر ءارىپ وزگەرتىلىپ، كونترافاكتىلى كامپيتتەر ساتىلىپ جاتقانى انىقتالدى، دەپ حابارلايدى Almaty-akshamy.kz
پاۆلودارداعى «اسىل» بازارىندا جانە «ولجا» ساۋدا ۇيىندە ءقاۋىپتى تاتتىلەر ساتىلىپ كەلگەن.
Pavlodarnews.kzء-تىڭ جازۋىنشا، ساراپشىلار زەرتحاناعا Fiberello كامپيتتەرىنىڭ ۇلگىلەرىن تاپسىرىپ، ناتيجەسىندە ولاردىڭ قۇرامىندا كوليفورما — ىشەك تاياقشالارى مەن رۇقسات ەتىلگەن مولشەردەن اسىپ كەتكەن اشىتقىلار انىقتالدى. بۇل ءونىمدى ءوندىرۋ جانە ساقتاۋ ەرەجەلەرىنىڭ بۇزىلعانىن كورسەتەدى. اشىتقى مولشەرى نورمادان جوعارى بولعاندىقتان اعزادا ۋلى زاتتار جينالىپ، ديسباكتەريوزعا، اسقازان-ىشەك جولدارىنىڭ بۇزىلۋىنا جانە مەتابوليزمگە الىپ كەلەدى.
«جالعان ءونىم شىعارۋ ايتقىسىز اۋقىمعا جەتتى. نارىققا اناليز جاساۋ كەزىندە انىقتالعان بارلىق كونترافاكتىلى ونىمدەردىڭ شىعۋ تەگى بەلگىسىز»، دەدى ۇلتتىق تۇتىنۋشىلار ليگاسىنىڭ پرەزيدەنتى سۆەتلانا رومانوۆسكايا.
ونىمەن قوسا، تاۋارلار تاڭبالاۋ تالاپتارىنا سايكەس كەلمەگەن: قاپتامالاردا ءوندىرۋشى تۋرالى اقپارات، ءونىم قۇرامىنىڭ سيپاتتاماسى بولمادى.
ءمالىم ەتىلگەندەي، جالعان كامپيتتەردىڭ قاپتاماسىندا كوبىنە وزبەكستانداعى ءوندىرۋشى كومپانيالاردىڭ مەكەنجايى كورسەتىلگەن. ءبىراق ونداي مەكەنجايلار بويىنشا ءوندىرىس ورنى بولماي شىقتى. ياعني، تاتتىلەر زاڭسىز جولمەن جاسالعان.
سۆەتلانا رومانوۆسكايانىڭ ايتۋىنشا، تانىمال برەندتەرگە ۇقساتىلىپ جاسالعان كامپيتتەر سالادا باقىلاۋدىڭ تولىق بولماۋىنىڭ دالەلى. كونترافاكتىنىڭ نارىققا ءتۇسۋىن انىقتاۋمەن ەشكىم اينالىسپايدى.
«باستى سەبەپتەردىڭ ءبىرى — بيزنەستى تەكسەرۋگە جاريالانعان موراتوريي. بۇل تىيىم ادال وندىرۋشىلەر مەن زاڭ بۇزۋشىلاردى ادىلەتسىز جاعدايلارعا دۋشار ەتەدى»، دەدى ۇيىم باسشىسى.
قازاقستاننىڭ ۇلتتىق كاسىپكەرلەر پالاتاسىنىڭ مالىمەتىنشە، 2018 جىلدان 2021 جىلعا دەيىن ەلگە 30 ميلليارد تەڭگەگە كونترافاكتىلى ءونىم اكەلىنگەن. بۇل كولەم جىل سايىن 10 پايىزعا ارتىپ وتىر.