رەسەيدىڭ كامچاتكا ولكەسىندە 1952 جىلدان بەرى تىركەلگەن ەڭ جويقىن جەر سىلكىنىسى بولدى. سەيسمولوگتاردىڭ باعالاۋىنشا، جەراستى دۇمپۋلەرىنىڭ ماگنيتۋداسى 8،5–8،7-گە دەيىن جەتكەن، - دەپ حابارلايدى اqshamnews.kz.
جەر سىلكىنىسى استانا ۋاقىتى بويىنشا ساعات 04:24-تە بولعان.
"ءقازىر عانا كامچاتكا سەيسموفوكالدىق ايماعىندا 1952 جىلدان بەرگى ەڭ جويقىن جەر سىلكىنىسى تىركەلدى. ءارتۇرلى دەرەكتەر بويىنشا، ماگنيتۋداسى 8،7-گە دەيىن جەتەدى"، — دەلىنگەن رەسەي عىلىم اكادەمياسىنىڭ گەوفيزيكا قىزمەتىنىڭ حابارلاماسىندا.
ەۋروپا-جەرورتا تەڭىزى سەيسمولوگيالىق ورتالىعى (EMSC) دا وسىنداي ماگنيتۋدا كورسەتكەن.
زارداپتار مەن جاپا شەككەندەر
ايماقتاعى بالاباقشالاردىڭ بىرىندە جەر سىلكىنىسى سالدارىنان قابىرعا قۇلاعان. كامچاتكا ولكەسىنىڭ گۋبەرناتورى ۆلاديمير سولودوۆتىڭ ايتۋىنشا، توتەنشە جاعداي كەزىندە عيماراتتا ادامدار بولماعان، زارداپ شەككەندەر جوق.
گۋبەرناتور مامانداردىڭ مەكتەپتەر، مەديسينالىق مەكەمەلەر جانە باسقا دا الەۋمەتتىك ماڭىزى بار نىسانداردى تەكسەرىپ جاتقانىن ايتتى.
كامچاتكا ولكەسىندەگى تجم دەرەگىنشە، پەتروپاۆلوۆسك-كامچاتسكيي قالاسىندا دۇمپۋلەردىڭ كۇشى 7–8 باللعا جەتكەن.
سۋنامي كامچاتكا مەن سولتۇستىك كۋريلسككە جەتتى
ساحالين وبلىسىنىڭ گۋبەرناتورى ۆالەريي ليمارەنكونىڭ ايتۋىنشا، سيەۆەرو-كۋريلسك قالاسىندا ماگنيتۋداسى 7،9-عا تەڭ جەر سىلكىنىسى سەزىلگەن. جاعالاۋعا العاشقى سۋنامي تولقىنى سوققان.
ساحالين وبلىسى بويىنشا تجم قالانىڭ ءبىر بولىگىن سۋ باسقانىن حابارلادى.
كامچاتكادا بيىكتىگى ءتورت مەترگە دەيىنگى سۋنامي تولقىنى تىركەلگەن. مۇنى ايماقتىڭ گيدرومەتەورولوگيا جانە قورشاعان ورتانى مونيتورينگىلەۋ باسقارماسى مالىمدەدى.
باسقا ەلدەرگە تونگەن ءقاۋىپ
رەسەي تجم مالىمەتىنشە، تىنىق مۇحيتى اكۆاتورياسىندا تولقىنداردىڭ جاپونيانىڭ شىعىس جاعالاۋىنا دەيىن جەتۋى مۇمكىن، تولقىن بيىكتىگى 32 سانتيمەترگە دەيىن بولۋى ىقتيمال. ەلدە سۋنامي ءقاۋپى جاريالانىپ، پويىز قوزعالىسى توقتاتىلعان. اۋە ارقىلى مونيتورينگ جۇرگىزۋ ءۇشىن جويعىش ۇشاقتار تارتىلعان. جاپون بيلىگى جاعالاۋ ماڭىنداعى تۇرعىنداردى ەۆاكۋاسيالاۋعا شاقىردى.
سۋنامي تۋرالى ەسكەرتۋ اقش-تىڭ الياسكا، كاليفورنيا، ورەگون جانە ۆاشينگتون شتاتتارىندا دا جاريالاندى. فيليپپيندەردە دە ۇقساس شارالار قابىلدانعان.
افتەرشوكتار بولۋى مۇمكىن
مامانداردىڭ ايتۋىنشا، الداعى ءبىر اي ىشىندە وڭىردە ماگنيتۋداسى 7،5-كە دەيىن جەتەتىن افتەرشوكتار بولۋى ىقتيمال. سەيسميكالىق بەلسەندىلىك ءبىراز ۋاقىتقا دەيىن ساقتالۋى مۇمكىن.