2025 جىلدىڭ العاشقى ءىرى ات جارىسى دۋبايدا ءوتتى، دەپ حابارلايدى Aqshamnews.kz
قازاقستاندىق تىلەك مۇحانبەتقالييەۆتىڭ تانىمال سايگۇلىگى كابيرحان 12 تۇلپاردىڭ اراسىندا 7-ورىنعا تۇراقتادى. وكىنىشكە وراي، قارجىلاي سىياقى تەك الدىڭعى 6 ورىنعا تابان تىرەگەن تۇلپارلارعا عانا بەرىلەدى،
دۋبايداعى بۇل جارىس الەمدەگى ەڭ بەدەلدى ات بايگەلەرىنىڭ ءبىرى سانالادى. وندا 30 ميلليون دوللار كولەمىندە جالپى سىياقى قورى بولىنگەن. قازاقستاننىڭ اتىنان بىرنەشە تۇلپار قاتىسقانىمەن، ولاردىڭ ەشقايسىسى جۇلدەلى ورىنعا ىلىگە المادى. دەگەنمەن، قازاق سايگۇلىكتەرىنىڭ وسىنداي حالىقارالىق دەڭگەيدەگى دودالارعا قاتىسۋى ۇلتتىق ات سپورتى ءۇشىن ۇلكەن جەتىستىك رەتىندە باعالانۋدا.
اتبەگى قانات مەدينوۆ بۇل ناتيجەنىڭ ماڭىزدىلىعىن ەرەكشە اتاپ ءوتتى:
"ەميراتتا ۇشقىر بايگە جاقسى دامىعان. ءبىزدىڭ الماتى بايگەسى دە جاقسى كورسەتىپ جاتىر. بيىل بىلتىرمەن سالىستىرعاندا 15 جاڭا تۇلپار جارىسقا قاتىستى. قازاقستان اتىنان. تىلەك اعامىزعا راقمەت. وسىلاي دامىتىپ، جول اشقان سول كىسى".
قازاق دالاسىندا تۇلپارلار ەجەلدەن ۇلتتىڭ ماقتانىشى مەن سەرىگى بولعانى بەلگىلى. قازىرگى تاڭدا قازاقستاندا ات سپورتى قارقىندى دامىپ كەلەدى. سوڭعى جىلدارى وتاندىق اتبەگىلەر مەن بايگەگە قاتىساتىن تۇلپارلاردىڭ سانى ارتىپ، حالىقارالىق جارىستارعا قاتىسۋ كورسەتكىشى جوعارىلاپ كەلەدى. دۋباي بايگەسىنە قاتىسقان 15 جاڭا سايگۇلىك وسىنىڭ ايقىن دالەلى.
تىلەك مۇحانبەتقالييەۆتىڭ كابيرحان ەسىمدى سايگۇلىگى سوڭعى جىلدارى بەدەلدى جارىستاردا قازاقستاننىڭ نامىسىن قورعاپ، تانىلىپ كەلەدى. بۇل جولى جۇلدەلى ورىنعا ىلىكپەگەنىمەن، مۇنداي بايگەلەرگە تۇراقتى قاتىسۋ ارقىلى قازاق سايگۇلىكتەرىنىڭ الەۋەتى الەمدىك دەڭگەيدە مويىندالۋدا.
دۋباي بايگەسى قازاق سايگۇلىكتەرى ءۇشىن ۇلكەن تاجىريبە بولدى. جارىستا جۇلدە الماسا دا، تىلەك مۇحانبەتقالييەۆ پەن ونىڭ كومانداسىنىڭ ەڭبەگى ۇلتتىق ات سپورتىنىڭ دامۋىنا قوسىلعان ماڭىزدى ۇلەس. مۇنداي قادامدار بولاشاقتا قازاق تۇلپارلارىنىڭ حالىقارالىق دودالاردا جەڭىس تۇعىرىنان كورىنۋىنە نەگىز بولارى انىق.