بۇل ماسەلەنى سەناتور ءالي بەكتايەۆ كوتەردى.
سەناتور پرەمەر-مينيسترگە جولداعان دەپۋتاتتىق ساۋالىندا جىلىجاي شارۋاشىلىعىمەن اينالىساتىن فەرمەرلەر كوممۋنالدىق تاريفتەردىڭ قىمباتتىعىنا، وتىنمەن قامتاماسىز ەتۋدەگى ۇزىلىستەرگە جانە مەملەكەتتىك قولداۋ دەڭگەيىنىڭ تومەندىگىنە تاپ بولعانى تۋرالى ايتتى، دەپ حابارلايدى Almaty-akshamy.kz Egemen.kz-كە سىلتەمە جاساپ.
«بۇگىنگى تاڭدا رەسپۋبليكامىزدا بارلىعى 1 265 گەكتار جىلىجايلاردىڭ 844 گەكتارى تۇركىستان وبلىسىندا ورنالاسقان. ولاردا جىل سايىن 91 مىڭ توننا كوكونىس وندىرىلەدى، بۇل ەل تۇرعىندارىن قامتاماسىز ەتىپ وتىر. جىلىجايلاردا بارلىعى 12 مىڭنان استام شارۋا قوجالىقتارى جۇمىس ىستەيدى. تۇركىستان وبلىسىندا وندىرىلەتىن ءونىمنىڭ 66%-ى سارىاعاش اۋدانىندا وسەدى. ول اۋداننىڭ جالپى ىشكى ءونىمىنىڭ 30%-ىن قۇرايدى. بۇگىندە جىلىجاي ءوندىرىسى ءوڭىر اۋىل شارۋاشىلىعىنىڭ نەگىزىن قۇرايتىن، حالىقتى ساپالى كوكونىسپەن قامتاماسىز ەتىپ وتىرعان، سىرتتان كەلەتىن يمپورتتىق ونىمدەرگە توتەپ بەرە الاتىن سالاعا اينالىپ كەلە جاتىر. سوندىقتان بۇل سالانى قولداۋ ەلىمىزدىڭ ىشكى نارىعىن جانە ازىق-تۇلىك قاۋىپسىزدىگىن قولداۋ بولىپ ەسەپتەلەدى»، - دەدى سەناتور ءالي بەكتايەۆ.
دەپۋتات بۇل سالانىڭ دامۋىنا تەرىس اسەر ەتەتىن نەگىزگى فاكتور – كوممۋنالدىق قىزمەتتەردىڭ جوعارى قۇنى ەكەنىن اتاپ ءوتتى. سونىمەن قاتار، قىسقى جاعدايدا جىلىجاي شارۋاشىلىقتارىنىڭ الەۋمەتتىك ماڭىزدىلىعىن ەسكەرە وتىرىپ، ولارعا دا قوسىمشا كومىر ءبولۋ قاجەت.
سەناتور قازىرگى تاڭدا جىلىجاي ءوندىرىسىنىڭ باعاسىنا، ساپاسىنا جانە كولەمىنە ءىس جۇزىندە اسەر ەتپەيتىن جىلىجاي ءوندىرىسىن مەملەكەتتىك قولداۋدى كۇشەيتۋ قاجەتتىگى تۋرالى دا ايتتى.
«اسىرەسە، وزدەرى ۇرىق شىعارىپ، كوشەت ءوسىرىپ، ولاردى ەگىپ، ءونىم الىپ جاتقان جىلىجايلاردى مەملەكەتتىك قولداۋ وتە ماڭىزدى. سوندىقتان تۇقىمعا، كوشەتكە، كوممۋنالدىق شىعىنداردى تومەندەتۋگە ارنالعان قوسىمشا قارجى تەتىكتەرى قارالۋ كەرەك. جىلىجايمەن اينالىساتىن تاۋار وندىرۋشىلەردى جەڭىلدەتىلگەن نەسيەلەرمەن قامتاماسىز ەتۋ دە اسا ماڭىزدى. جىلىجاي ءوندىرىسىن قولداۋ جانە دامىتۋعا قاتىستى پروبلەمالاردى ۇكىمەت دەڭگەيىندە ارنايى قاراپ، كەشەندى شەشىمدەر قابىلداۋ قاجەت دەپ ەسەپتەيمىز»، - دەدى ءالي بەكتايەۆ.