بۇل تۋرالى ۇكىمەت باسشىسى ايتتى.
ورتالىق مەملەكەتتىك ورگاندار مەن وبلىس اكىمدىكتەرى باسشىلارىنىڭ قاتىسۋىمەن كەڭەس وتكىزگەن ق ر پرەمەر-مينيسترى ءاليحان سمايىلوۆ الداعى جىلۋ بەرۋ ماۋسىمىنا دايىندىق ماسەلەلەرى جونىندە مالىمدەدى، دەپ حابارلايدى Almaty-akshamy.kz
ۇكىمەت باسشىسى بۇگىندە دايىندىق جۇمىستارىنىڭ بارىسىندا وتە مۇقيات قاراۋدى قاجەت ەتەتىن پروبلەمالىق ماسەلەلەر تۋىنداپ جاتقانىن ايتتى. اتاپ ايتقاندا، ءبىرقاتار وبەكت بويىنشا جوندەۋ جۇمىستارى مەرزىمىنەن كەشىگىپ جۇرۋدە.
«بۇل ماسەلەنى ءبىز جاقىندا وتكەن ۇكىمەت وتىرىسىندا تالقىلادىق. دەگەنمەن ءوزارا ۇيلەسىمدى، بىرلەسكەن ءىس-قيمىلدى بۇدان دا كۇشەيتۋ قاجەت. سوندىقتان وسى جۇمىستاردىڭ بارلىعىن تاعى دا مۇقيات قاراپ، تىكەلەي شەشىم قابىلدايمىز»، - دەدى ءاليحان سمايىلوۆ.
پرەمەر-مينيستر جىلۋ بەرۋ ماۋسىمىنا دايىندىق ماسەلەلەرى ۇلكەن الەۋمەتتىك ماڭىزعا يە ەكەنىن اتاپ ءوتتى، سوندىقتان قازىردەن باستاپ ءىرى اپاتتاردىڭ الدىن الىپ، جىلىتۋ ماۋسىمىنىڭ تۇراقتى ءوتۋى ءۇشىن قاجەتتى شارالاردى قابىلداۋ قاجەت.
«اتاپ ايتقاندا، جەو جانە جەلىلەر يەلەرىمەن تىكەلەي، تىعىز جۇمىس جاساۋ ماڭىزدى. مەملەكەت تاراپىنان ستانسيالاردىڭ وتىنىمدەرىنە سايكەس تاريفتەر بەكىتىلدى. بۇل قارجىلاندىرۋدى تارتۋعا جانە جاڭعىرتۋ جۇمىستارىن باستاۋعا مۇمكىندىك بەرەدى»، - دەدى ءاليحان سمايىلوۆ.
سونداي-اق ۇكىمەت باسشىسى ەنەرگەتيكا سالاسىن باقىلاۋدى كۇشەيتۋدىڭ جانە ءتيىستى وڭىرلىك شتابتار جۇمىسىنىڭ ماڭىزىن اتاپ ءوتتى.
ۇكىمەت باسشىسى ءبىرىنشى ۆيسە-پرەمەر رومان سكليارعا جانە ەنەرگەتيكا ءمينيسترى الماسادام ساتقالييەۆكە كەستەگە سايكەس جۇرگىزىلىپ جاتقان جۇمىستاردىڭ بارىسىن جەكە باقىلاۋ ءۇشىن رەسپۋبليكانىڭ ەنەرگەتيكالىق نىساندارىن تەكسەرۋدى تاپسىردى.
«رومان ۆاسيليەۆيچ، بۇگىندە ءسىز كەستە بويىنشا پاۆلودار وبلىسىنىڭ ەنەرگەتيكالىق نىساندارىن، ونىڭ ىشىندە ەكىباستۇز جەو-سىن تەكسەرۋىڭىز كەرەك. كەڭەس اياقتالعاننان كەيىن تەز ارادا جولعا شىعۋىڭىزدى سۇرايمىن. كەلەسى اپتادا الماسادام مايدان ۇلى ريددەر جانە كەنتاۋ جەو-لارىنا بارادى»، - دەدى پرەمەر-مينيستر.