الەۋمەتتىك جەلىدە فۋتبول جەيدەسىن ۇمىتىپ كەتتىم دەپ، اكەسىن ۇزاق جولدان قايتا ارتقا قايتارعان بالاقايدىڭ ارەكەتى كوپتى دۋ كۇلدىردى. 2-سىنىپ وقيتىن ديماشتىڭ اكەسى باقىتجان ەرماحانوۆ ۇلىنىڭ ارەكەتىن ۆيدەوعا تۇسىرەمىن دەپ، ءبىر كۇندە جەلى جۇلدىزىنا اينالدى. ونىڭ جۇكتەگەن بەينەسى بىرنەشە ميلليون قارالىم جيناعان. اqshamnews.kz ءتىلشىسى "جىلدىڭ ەڭ مەيىرىمدى ادامى" اتاعىنا لايىق دەپ تانىلىپ جاتقان ازاماتپەن تىلدەستى.
قىزىلوردانىڭ تۋماسى، ءقازىر استانا ماڭىنداعى تالاپكەر اۋىلىندا تۇراتىن ءانشى، اسابا باقىتجان ەرماحانوۆتى جەلىدەگى حيت ۆيدەو ارقىلى كوپشىلىك تانىپ قالدى. بۇگىندە جۇبايى اينۇر ەكەۋى ءتورت بالانى تاربيەلەپ ءوسىرىپ وتىر.
ميلليوندار كورگەن ۆيدەوداعى جايت قالاي بولدى؟
جۇرتتىڭ ەزۋىنە كۇلكى ۇيالاتقان بەينەدەگى ەڭ كىشى ۇلى - دىنمۇحاممەد. ول استاناداعى مەكتەپتەردىڭ بىرىندە فۋتبولعا قاتىسادى. ديماش پەن اكەسىنىڭ جۇرت تانىعان ۆيدەوسىنا ءدال وسى فۋتبول ۇيىرمەسى سەبەپ بولعان.
"بالامدى فۋتبولىنان الىپ كەتىپ، اۋىلعا جەتىپ قالعان ەدىك. ءوزىم تويعا اسىعىپ تۇرعانمىن. ءبىر كەزدە ۇلىم "اكە، فۋتبول جەيدەمدى ۇمىتىپ كەتىپپىن" دەدى. ديماشتىڭ كوڭىلى تۇسپەسىن دەپ اۋىلعا جەتىپ تۇرعان جەرىمىزدەن قايتا بۇرىلىپ مەكتەبىنە باردىق. 22 شاقىرىمدى ارتقا تاستاپ، جەتىپ بارىپ، جەيدەسىن ىزدەي باستادىق. اعايىنا دا حابارلاسىپ سۇرادىق، تاپپادىق. ءبىر كەزدە دىنمۇحاممەد “اكە، ىستىقتاپ كەتتىم” دەدى. “ىستىقتاساڭ كۇرتەڭدى شەش، الدىڭدى اعىتىپ قوي” دەپ شەشكىزىپ جاتسام، جەيدەسى ۇستىندە ەكەن. “اكە، ۇستىمە كيىپ الىپپىن عوي” دەپ تىرقىلداپ كۇلدى"، – دەيدى باقىتجان مىرزا.
ەكەۋى ارتىنشا وقيعاعا ابدەن كۇلگەن.
"بالامنىڭ كۇلكىسىن كورگەندە قالاي اشۋلاناسىڭ؟ ەكەۋمىز جول بويى تىرقىلداپ كۇلىپ قايتتىق. سول ءساتتى ۆيدەوعا ءتۇسىرىپ الىپ، جۇكتەگەن ەدىم"، – دەيدى ول.
"حابارلامالاردان تەلەفونىم قاتىپ قالدى"
جاي عانا وتباسىلىق ءسات تۇسىرىلگەن ۆيدەو الەۋمەتتىك جەلىگە جۇكتەلگەن سوڭ، كۇتپەگەن جەردەن كوپ قارالىم جيناپ كەتكەن.
"ۆيدەو بىرنەشە ميلليون قارالىم جيناپتى. جان-جاقتان ءبارى جىبەرىپ جاتىر. “حيت بولىپ جاتىرسىزدار عوي” دەپ تە ايتىپ جاتىر. ءوزىمىز دە ريزا بولىپ، كۇلىپ ءجۇرمىز. جازعان ادامنىڭ كوبى سونشا، حابارلامالاردان تەلەفونىم قاتىپ قالدى"، – دەيدى باقىتجان ەرماحانوۆ.
كوپشىلىك اكەنىڭ بالاسىنا ۇرىسپاي، كەرىسىنشە كۇلە قاراپ، جاعدايدى ازىلگە بۇرعانىنا ەرەكشە سۇيسىنگەن. كوپ پىكىردە ءدال وسىلاي سابىرلىق تانىتا ءبىلۋ كەز كەلگەننىڭ قولىنان كەلە بەرمەيتىن ءىس ەكەنى جازىلعان.
تاياقسىز تاربيە مەن ۇنەمى كۇلىپ ءجۇرۋدىڭ قۇپياسى نە؟
باقىتجان مىرزا وتە بالاجان ەكەنىن جانە بالا تاربيەسىندە تاياق قولدانۋدى ارتىق سانايتىنىن ايتتى.
"ءبىز كىشكەنتايىمىزدا تاياق جەپ وستىك قوي. ءقازىر سول ءبىز كورمەگەن مەيىرىمدى بالالارىمىز كورسە دەيمىن. بالانى ۇرىپ، قورقىتىپ تاربيەلەۋگە قارسىمىن. بالالارىمنىڭ الدى ءوز وتاۋىن قۇردى، ءقازىر قولداعى ەكەۋىنە بارىنشا اتا-انالىق ماحابباتقا بولەپ ءوسىرىپ جاتىرمىز"، – دەيدى ول.
ۇنەمى كۇلىپ جۇرەتىن باقىتجان مىرزا ومىرلىك ۇستانىمى تۋرالى دا وي ءبولىستى.
"ءاردايىم كۇلىپ ءجۇرۋ كەرەك. كۇلكىمەن ءومىر جەڭىلىرەك قوي. ۇنەمى پوزيتيۆ ءجۇرۋدىڭ قۇپياسى جوق. جانىڭداعى جۇبايىڭ جاقسى بولسا، بالا-شاعاڭ امان بولسا، باۋىرىڭ ءبۇتىن، باسىڭ امان بولسا – سونىڭ ءوزى ۇلكەن باقىت. سول باقىتتى سەزىنە وتىرىپ، كوڭىلدى جۇرمەۋ – قاتەلىك. سوندىقتان ءار كۇنىمىزگە شۇكىرلىك ەتىپ، ۇنەمى كۇلىپ، كوڭىلدى جۇرگەنىمىز ابزال"، – دەيدى باقىتجان ەرماحانوۆ.