الماتىدا سۋ ەسەپتەۋ جۇيەسىن جاڭعىرتۋ جۇمىستارى قارقىن العان. الاتاۋ اۋدانىنىڭ تۇرعىندارىمەن كەزدەسۋدە قالا اكىمى ەربولات دوسايەۆ بيىلعى جىلدىڭ باستى مىندەتى — الماتىلىقتاردىڭ باسىم بولىگىن سۋ ءۇشىن ەسەپتەگىش ارقىلى تولەۋگە كوشىرۋ ەكەنىن اتاپ ءوتتى.
«جىل سوڭىنا دەيىن ەسەپتەگىشپەن قامتۋدى 90%-عا جەتكىزۋ مىندەتى تۇر»، – دەدى قالا اكىمى. ول ەسەپتەگىش ورناتىلعاننان كەيىن كوپتەگەن تۇرعىننىڭ سۋدى تۇتىنۋعا ۇقىپتى قاراي باستاعانىن ايتتى.
اكىمنىڭ ايتۋىنشا، بۇگىندە قالادا قولجەتىمدى ءارى ساپالى ەسەپتەگىشتەردى ۇسىناتىن 20 كومپانيا جۇمىس ىستەيدى. ءقازىر ەسەپتەگىش ورناتۋ باعاسى جاعىنان دا، قولجەتىمدىلىك تۇرعىسىنان دا قيىندىق تۋعىزبايدى.
«بىزدە سۋ تۇتىنۋدىڭ بەلگىلەنگەن نورماسى بار. ەگەر ءسىز سول نورمادان اسساڭىز، جوعارى تاريفپەن، اسپاساڭىز، قاراپايىم تاريفپەن تولەيسىز»، – دەدى اكىم تولەم ەسەپتەۋدىڭ جۇيەسىنە نازار اۋدارا وتىرىپ.