قازاقستاندا حالىققا قىزمەت كورسەتۋ ورتالىقتارىنا (حقو) كەلەتىن ازاماتتاردىڭ 80%-عا جۋىعى ون نەگىزگى قىزمەت ءتۇرى بويىنشا كەلەدى. ولاردىڭ بارلىعى جىل سوڭىنا دەيىن ونلاين رەجيمگە كوشىرىلەدى.
بۇل تۋرالى سيفرلىق دامۋ، يننوۆاسيالار جانە اەروعارىش ونەركاسىبى ۆيسە-مينيسترى روستيسلاۆ كونياشكين ءمالىم ەتتى، دەپ حابارلايدى aqshamnews.kz.
ۆەدومستۆو مالىمەتىنشە، بۇگىندە حالىققا قىزمەت كورسەتۋ ورتالىقتارى 1250-گە جۋىق مەملەكەتتىك قىزمەت كورسەتەدى. الايدا، تالداۋ ناتيجەسى نەگىزگى جۇكتەمە تانىمال سۇرانىستاردىڭ شەكتەۋلى تىزىمىنە عانا تۇسەتىنىن كورسەتتى.
— ازاماتتاردىڭ وتىنىشتەرىن تالداۋ قىزىق جايتتى كورسەتتى: ازاماتتاردىڭ جالپى اعىنىنىڭ 79 پايىزى نەبارى ون قىزمەت بويىنشا كەلەدى. ياعني، تەك ون قىزمەت وفلاين فورماتتا نەگىزگى اعىندى جاسايدى. مۇنىڭ ەكى سەبەبى بار: كەيبىر قىزمەت سيفرلاندىرىلعان، ءبىراق ىڭعايلى ەمەس جانە بۇل پروسەستى جەڭىلدەتۋ قاجەت، — دەپ اتاپ ءوتتى كونياشكين.
ونىڭ ايتۋىنشا، بۇرىن-سوڭدى ونلاين فورماتتا كورسەتىلمەگەن، ەندى سيفرلاندىرىلاتىن قىزمەتتەر بار.
— وسى ون قىزمەتتىڭ بارلىعىن جىل سوڭىنا دەيىن تولىق ونلاين فورماتقا كوشىرۋدى جوسپارلاپ وتىرمىز. جاقىندا عانا جەكە كۋالىكتى قايتا رەسىمدەۋ قىزمەتى ىسكە قوسىلدى. بۇل ەڭ ماڭىزدى ساتتەردىڭ ءبىرى شىعار. نەگىزگى قىزمەتتەر قۇجاتتاما جولىندا. پيلوتتىق سىناقتىڭ ناتيجەسى بويىنشا، ەگەر ول ءساتتى بولسا، ودان ءارى قولعا الىپ، ءتولقۇجاتتاردى قايتا شىعارۋدى باستايمىز، — دەدى ۆيسە-مينيستر.
ول باسقا دا نەگىزگى قىزمەتتەردىڭ قاتارىندا جۇرگىزۋشى كۋالىگىن باستاپقى الۋ، تىركەۋ قىزمەتتەرى، شەتەل ازاماتتارىنا رۇقسات الۋ، جىلجىمايتىن مۇلىك جانە جەر قىزمەتتەرىن اتاپ ءوتتى.
ەلەكتروندى سيفرلىق قولتاڭبانى الۋ قىزمەتتەرى تولىعىمەن ونلاين فورماتقا اۋىستىرىلادى، ويتكەنى ازاماتتاردىڭ 10%-دان ازى ونى وففلاين رەجيمدە الادى.
— حالىققا قىزمەت كورسەتۋ ورتالىقتارىندا بۇل قىزمەتتى تولىعىمەن جابۋدى جوسپارلاپ وتىرمىز. ازامات حقو-عا كەلسە دە، ونى كومپيۋتەرگە اپارىپ، EGOV اشادى نەمەسە EGOV Mobile جۇكتەپ الىپ، ەلەكتروندى سيفرلىق قولتاڭبانى ونلاين رەجيمدە الۋعا كومەكتەسەدى، — دەدى ۆيسە-مينيستر.