قالدىقتاردى قايتا وڭدەۋ ماسەلەسى وتە وزەكتى.
ەلىمىزدە جىل سايىن 4،5 ملن توننا قاتتى تۇرمىس قالدىق شىعارىلادى. ءبىراق ونىڭ از بولىگى عانا وڭدەلەدى. بۇل تۋرالى قازاقستان ەكولوگيالىق ۇيىمدارىنىڭ مەنەدجەرى دامير اۋەتايەۆ ايتتى، دەپ حابارلايدى Almaty-akshamy.kz Inbusinnes.kz سىلتەمە جاساپ.
«بۇگىندە تۇرمىستىق قالدىقتاردى قايتا وڭدەۋ ماسەلەسى وتە وزەكتى. مىسالى، ءاربىر قازاقستاندىق جىل سايىن 280-330 مىڭ كەلى قالدىق قالدىرادى. قاتتى تۇرمىستىق قالدىقتاردىڭ باسىم بولىگى قالالارداعى پوليگونداردا، قوقىس الاڭدارىندا جينالادى. ولاردىڭ 97% قورشاعان ورتانى قورعاۋ زاڭىنىڭ تالاپتارىنا ساي كەلمەيدى. جىل سايىن قازاقستاندا 4،5 ملن توننا قاتتى تۇرمىستىق قالدىق شىعارىلادى. ءبىراق ونىڭ بولىگى عانا قايتا وڭدەلەدى»، - دەدى دامير اۋەتايەۆ StopMusor ەكو-كامپانياسى اياسىندا وتكەن ءىس-شارادا.
ونىڭ ايتۋىنشا، 2020 جىلدىڭ قورىتىندىسى بويىنشا قاتتى تۇرمىستىق قالدىقتاردى بولەك جيناۋ جانە سۇرىپتاۋ ورىندارى كوپ اشىلعان ءوڭىر – قاراعاندى وبلىسى. دامير اۋەتايەۆ مۇنداي ورىندار ەلىمىزدە كوپ اشىلۋى كەرەك دەگەن پىكىردە.
«الەمدە قوقىستى وڭدەۋ بويىنشا كوشباسىندا گەرمانيا تۇر. بۇل ەلدە جىلىنا 47،7 ملن قوقىس شىعارىلادى، ال قاتتى تۇرمىستىق قالدىقتاردى قايتا وڭدەۋ دەڭگەيى – 66%»، - دەدى مەنەدجەر.
ايتا كەتەيىك، StopMusor ەكو-كامپانياسى ەلىمىزدە ەكولوگيالىق مادەنيەتتى قالىپتاستىرۋ جانە تۇرمىستىق قالدىقتاردى جاۋاپكەرشىلىكپەن كادەگە جاراتۋ، سونداي-اق World clean up day دۇنيەجۇزىلىك اكسياسى اياسىندا ەرىكتىلەردى دايارلاۋ ءۇشىن ۇيىمداستىرىلدى.