بۇل سان ءالى دە ءوسىپ جاتىر.
اتەروسكلەروز پروبلەماسى جايىندا قازاقستان كارديولوگيالىق قوعامى باسقارماسىنىڭ ءتورايىمى ساۋلە ابسەيىتوۆا ارنايى وتكەن باسپا ءسوز ءماسليحاتى بارىسىندا ايتتى، دەپ حابارلايدى Almaty-akshamy.kz Baq.kz سىلتەمە جاساپ.
ماماننىڭ ايتۋىنشا، حولەستەرين دەڭگەيىنىڭ كوبەيۋى ورگانيزمگە وتە ءقاۋىپتى.
«حولەستەرين دەڭگەيىن سالاۋاتتى ءومىر سالتىن ۇستانۋ جانە دۇرىس تاماقتانۋ ارقىلى تومەندەتۋگە بولمايدى. كوپتەگەن ناۋقاستار ءۇشىن بۇل جەتكىلىكسىز. ءاربىر ناقتى ناۋقاسقا پروفيلاكتيكا نەمەسە ەمدەۋ بويىنشا قاجەتتى ۇسىنىمدار مەن پرەپاراتتاردى ونىڭ ىلەسپە اۋرۋلارى مەن جالپى جاي-كۇيىن ەسكەرە وتىرىپ، دارىگەر عانا تاڭداي الادى»، - دەپ ناقتىلاپ ءوتتى دارىگەر.
ايتۋىنشا، ددسۇ بارلىق ەلدەردى اتەروسكلەروز پروبلەماسىنا نازار اۋدارۋعا جانە ونىڭ الدىن الۋ ماسەلەلەرىن دەنساۋلىق ساقتاۋ جۇيەسى ساياساتىنىڭ نەگىزگى باسىمدىعى رەتىندە قويۋعا بىرنەشە جىلدان بەرى شاقىرىپ كەلەدى.
ال، ستاتيستيكا دەرەكتەرىنە سۇيەنسەك، 2020 جىلى ەلىمىزدە قان اينالىم جۇيەسى اۋرۋلارىنان بولاتىن ءولىم-جىتىم 100 مىڭ تۇرعىنعا شاققاندا 193،79 ادامدى قۇراعان. باسقاشا ايتقاندا، اتەروسكلەروزدان رەسپۋبليكادا ءبىر جىلدا 36 مىڭنان استام ادام قايتىس بولادى. بۇل سان ءالى دە ءوسىپ جاتىر.
الايدا اتەروسكلەروزدان بولاتىن ءولىم-جىتىم مەن اسقىنۋدى ەداۋىر تومەندەتۋگە بولادى. ددسۇ ساراپشىلارىنىڭ پىكىرىنشە، جۇرەك-قانتامىرلار اۋرۋلارى اسقىنۋلارىنىڭ 85%-ىن سالاۋاتتى ءومىر سالتىن ۇستانۋ، ۋاقتىلى تەكسەرىلۋ جانە ءقاۋىپ فاكتورلارىن انىقتاۋ، اۋرۋدىڭ ەرتە الدىن الۋ جانە ەمدەۋ، قانداعى «جامان» حولەستەرين دەڭگەيىن تومەندەتۋ ارقىلى بولدىرماۋعا بولادى
«40 جاستان اسقان ادامدار ەكى جىلدا ءبىر رەت جۇرەك-قانتامىرلارى اۋرۋلارىنا تەكسەرۋدەن ءوتۋى كەرەك. ول ەمحانالاردا تەگىن جۇرگىزىلەدى. بۇل ءسىزدى ەشتەڭە مازالاماسا دا ماڭىزدى. سەبەبى مۇنداي سكرينينگ، ءتىپتى دياگنوز بولماسا دا، الداعى 10 جىل ىشىندە اۋرۋدىڭ پايدا بولۋ ءقاۋپىن انىقتاۋعا كومەكتەسەدى. ەگەر حولەستەرين جوعارى بولسا، وندا سىزگە پروفيلاكتيكالىق ەم تاعايىندالادى»، - دەدى ساۋلە ابسەيىتوۆا.