ەلىمىزدە "قۇرمەتتى دونور" اتاعىن الۋ ءۇشىن 40 رەت قان تاپسىرۋ كەرەك.
ق ر دەنساۋلىق ساقتاۋ مينيسترلىگى مەديسينالىق كومەكتى ۇيىمداستىرۋ دەپارتامەنتى امبۋلاتوريالىق-ەمحانالىق جانە جەدەل مەديسينالىق كومەك باسقارماسىنىڭ باسشىسى باتىرحان سارىمساقوۆتىڭ ايتۋىنشا، جىل سايىن بىزدە شامامەن 80 مىڭعا جۋىق ناۋقاسقا قان قۇيىلادى، دەپ حابارلايدى Almaty-akshamy.kz.
«قازىرگى كەزدە قازاقستاندا قان قۇيۋ سالاسىندا جۇمىس ىستەيتىن 470-كە جۋىق مەديسينا ۇيىمى بار. جىل سايىن بىزدە شامامەن 80 مىڭعا جۋىق ناۋقاسقا قان قۇيىلادى. ولارعا 400 مىڭعا جۋىق قان قۇيۋ پروسەدۋراسى جۇرگىزىلەدى. ەلىمىزدە مەديسينا ۇيىمدارى 100 پايىز قان جانە ونىڭ كومپونەنتتەرىمەن قامتاماسىز ەتىلەدى. كوبىنە قان كومپونەنتتەرى اكۋشەرلىك تاجىريبەدە، ونكو-گەماتولوگيادا، حيرۋرگيادا جانە تراۆماتولوگيادا پايدالانىلادى»، - دەدى ب. سارىمساقوۆ ورتالىق كوممۋنيكاسيالار قىزمەتىندە.
وسى ورايدا ول قان قۇيۋ كۇردەلى پروسەسس ەكەنىن، قان ورتالىقتارىنا 300-گە جۋىق دارىگەر تارتىلاتىنىن ايتتى.
«بۇل سالا مەملەكەتتىڭ قولداۋىنسىز ءوزىنىڭ ناتيجەسىن بەرمەيدى. 2008 جىلدان باستاپ ەلىمىزدە زاماناۋي 10 قان ورتالىعى قۇرىلدى. بۇل ورتالىقتار سوڭعى بۋىندى تەحنولوگيامەن قامتىلدى. تمد ەلدەرى اراسىندا قازاقستان ءبىرىنشى بولىپ قان دونورلارىنا قاتىستى ەكى كەزەڭدى سكرينينگتى ەنگىزدى. بۇل ءوز كەزەگىندە ينفەكسيالىق اۋرۋلاردى انىقتاۋعا كومەكتەسەدى»، - دەدى باسقارما باسشىسى. ونىڭ سوزىنە قاراعاندا، 2 مىڭنان استام قازاقستاندىق دونور بولىپ سانالادى. سونىمەن قاتار، ەلىمىزدە 100-دەن اسا ادام «قۇرمەتتى دونور» اتانعان.
قازاقستاندا قۇرمەتتى دونور اتاعىن الۋ ءۇشىن 40 رەت قان تاپسىرۋ كەرەك. 2005 جىلعى مامىردا وتكەن دۇنيەجۇزىلىك دەنساۋلىق ساقتاۋ اسسامبلەياسىندا الەمنىڭ دەنساۋلىق ساقتاۋ مينيسترلەرى ءوز ەركىمەن قان تاپسىرۋدى قولداۋ تۋرالى ءوتىنىشتى قابىلدادى. بۇكىلالەمدىك قان تاپسىرۋشى كۇنىن جىل سايىن ماۋسىمنىڭ 14-ىندە وتكىزىپ تۇرۋ تۋرالى قارار قابىلداندى.