2024 جىلى قازاقستان رەسپۋبليكاسى قورعانىس مينيسترلىگى ارميا ورتالىق سپورت كلۋبىنىڭ سپورتشىلارى الەمدىك ارەنادا جارقىن جەتىستىكتەرىن كورسەتتى.
ولار بارلىعى 463 مەدال ولجالادى. 203 التىن، 120 كۇمىس جانە 140 قولا، دەپ حابارلايدى aqshamnews.kz قورعانىس مينيسترلىگىنە سىلتەمە جاساپ. بيىلعى جىلى ق ر قم اوسك سپورتشىلارى بوكس، دزيۋدو، كۇرەس، اتىس، گيمناستيكا، زاماناۋي بەسسايىس جانە باسقا دا سپورتتىڭ 10 تۇرىنەن قازاقستاننىڭ اتىنان پاريجدەگى وليمپيادا ويىندارىنا 21 ليسەنزيا جەڭىپ الدى.
پاريجدە وتكەن جازعى وليمپيادا ويىندارىندا قازاقستان قۇراماسى العان جەتى مەدالدىڭ تورتەۋىن ارميا سپورتشىلارىنىڭ ەنشىسىندە. الەم چەمپيوناتتارىندا 49 مەدال، ازيا چەمپيوناتتارىندا 32 مەدال، قازاقستان چەمپيوناتتارىندا 245 مەدال جانە حالىقارالىق تۋرنيرلەردە 133 مەدال جەڭىپ الدى.
ارميا سپورتشىلارى حالىقارالىق اسكەري سپورت كەڭەسىنىڭ (CISM) قولداۋىمەن جانە تمد شەڭبەرىندە 20-دان استام ماڭىزدى سپورتتىق ءىس-شارالارعا قاتىستى. ولاردىڭ قاتارىندا قىتايداعى 7ء-شى ازيالىق CISM وتىرىسى، دزيۋدو، كۇرەس، تحەكۆوندو جانە ۆولەيبولدان CISM الەم چەمپيوناتتارى، سونداي-اق رەسەيدەگى CISM قورعانىس ۆەدومستۆولارىنىڭ ءبىلىم بەرۋ ۇيىمدارى اراسىندا وتكەن تۋرنير دە بار. قورعانىس ءمينيسترى گەنەرال-پولكوۆنيك رۋسلان جاقسىلىقوۆ CISM حالىقارالىق اسكەري-سپورتتىق ۇيىمىمەن بايلانىستاردىڭ قايتا جاندانۋىن وڭ باعالادى جانە كەلەسى جىلى ونى باسقارۋدا قازاقستان قارۋلى كۇشتەرىنە ءبىر ورىن بەرىلەتىنىن مالىمدەدى.
تمد اياسىندا اسكەري سپورت كەشەنىنىڭ كوپسايىسى، ارميالىق قويان-قولتىق ۇرىستان جانە اتىستان چەمپيوناتتار ءوتتى.
ودان بولەك استانادا «قازاقستان رەسپۋبليكاسى قورعانىس ءمينيسترىنىڭ كۋبوگىنا» قويان-قولتىق ۇرىستان الەم كۋبوگىنىڭ فينالى ۇيىمداستىرىلدى جانە ارميا-گەنەرالى س.ق. نۇرماعامبەتوۆتى ەسكە الۋعا ارنالعان بوكستان حالىقارالىق تۋرنير ءوتتى.
جىل قورىتىندىسى: اسكەري سپورتشىلارعا اسكەري-قولدانبالى سپورت تۇرلەرىنەن 150-دەن استام سپورتتىق اتاقتار مەن رازريادتار بەرىلدى
حالىقارالىق ارەنادا قارۋلى كۇشتەردىڭ اتىنان ەل نامىسىن قازاقستاننىڭ ەڭبەك سىڭىرگەن 12 سپورت شەبەرى، حالىقارالىق دارەجەدەگى 77 سپورت شەبەرى، قازاقستان رەسپۋبليكاسىنىڭ 70 سپورت شەبەرى جانە سپورت شەبەرىنە ەكى كانديدات قورعاپ ءجۇر.
تەك بيىلعى جىلى جوعارى كورسەتكىشتەرى ءۇشىن اسكەري-سپورت تۇرلەرىنەن 158 سپورتتىق اتاقتار مەن رازريادتار بەرىلدى. ونىڭ ىشىندە قازاقستان رەسپۋبليكاسىنىڭ سپورت شەبەرى – 37 جانە ق ر سپورت شەبەرىنە ۇمىتكەر – 18. ق ر قم ارميا ورتالىق سپورت كلۋبى وتكىزگەن چەمپيوناتتاردا I رازريادتى – 42 اسكەري قىزمەتشى؛ II رازريادتى – 33 اسكەري قىزمەتشى جانە III رازريادتى – 28 اسكەري قىزمەتشى راستادى.
سپورتتىق جۇمىستىڭ قورىتىندىسى بويىنشا ەسەپتى ناتيجەلەرى جانە سپورتتىق-بۇقارالىق جۇمىستى ۇيىمداستىرعانى ءۇشىن قازاقستان رەسپۋبليكاسى قورعانىس مينيسترلىگىنىڭ بىرنەشە قۇرىلىمدىق بولىمشەلەرى مەن اسكەري قىزمەتشىلەرى ماراپاتتالدى. ولار قازاقستان رەسپۋبليكاسى قارۋلى كۇشتەرىنىڭ سپارتاكياداسىندا جانە قورعانىس مينيسترلىگىنىڭ اسكەري وكىلدەر ورتالىعىندا ءبىرىنشى ورىن الىپ، قۇرىلىمدىق بولىمشەلەر اراسىندا ۇزدىك اتاندى. اعا سەرجانت اسىلبەك ءومىرزاق ۇلى قاراباي ق ر قك ەرلەر اراسىندا ۇزدىك سپورتشى، ال سەرجانت اياجان بولات قىزى ءامىرجانوۆا ايەلدەر اراسىندا ۇزدىك سپورتشى اتاندى.
جىل قورىتىندىسى: قارۋلى كۇشتەردە اوسك اسكەري-سپورت كوللەدجى اشىلادى
قازاقستان رەسپۋبليكاسىنىڭ قورعانىس مينيسترلىگى دەنە شىنىقتىرۋ جانە سپورت سالاسىنداعى جۇيەلى وزگەرىستەردى ەنگىزۋدى جالعاستىرادى، اسكەري قىزمەتشىلەردىڭ بالالارىنا سپورتتىق داعدىلاردى دامىتۋعا مۇمكىندىك بەرە وتىرىپ، ولارعا ارنالعان جاتتىعۋلار دا وتكىزەدى.
2024 جىلى «جاس ۇلان» رەسپۋبليكالىق مەكتەبىن اوسك اسكەري-سپورت كوللەدجى رەتىندە قايتا باعدارلاۋ، سونداي-اق قۇرلىق اسكەرلەرىنىڭ اسكەري ينستيتۋتىندا دەنە شىنىقتىرۋ جانە سپورت كۋرستارىن قايتا باستاۋ جوسپارى ازىرلەنىپ، ىسكە اسىرىلماق. اسكەري كوللەدجگە ءتۇسۋ كەزىندە اسكەري قىزمەتشىلەردىڭ بالالارىنا، كوپ بالالى وتباسىلاردان شىققان بالالارعا جانە اۋىلدىق جەرلەردەن كەلگەن بالالارعا ارنالعان باسىمدىقتار ەسكەرىلەتىن بولادى.
ۇلتتىق سپورت تۇرلەرىن ناسيحاتتاۋ باعدارلاماسى اياسىندا 2025 جىلى استانادا اسكەري قىزمەتشىلەر اراسىندا قازاق كۇرەسىنەن تۇڭعىش رەت الەم چەمپيوناتى وتەدى.
بۇدان بولەك، سەگىز گارنيزوننىڭ سپورت كەشەندەرىندە جانە ءۇش وقۋ-جاتتىعۋ ورتالىعىندا دزيۋدو، قازاق كۇرەسى، سامبو، بوكس، شاعىن فۋتبول، ۇستەل تەننيسى، شاحمات جانە دويبى، توعىزقۇمالاق جانە باسقا دا سپورت تۇرلەرىنەن جەتى مىڭنان استام اسكەري قىزمەتشىنىڭ بالالارى تەگىن جاتتىعاتىن بولادى.