استانادا وتكەن كوشپەندىلەر ويىندارى توعىزقۇمالاق ويىنىن افريكاعا دەيىن تانىتقان

توعىزقۇمالاقتى بۇگىندە افريكانىڭ سەگىز ەلىندە 100 جۋىق ادام وينايدى، دەپ حابارلايدى aqshamnews.kz.

24.kz ارناسى تاراتقان اقپاراتقا ساي، بۇل تۋرالى دۇنيەجۇزىلىك توعىزقۇمالاق فەدەراسياسىنىڭ افريكا قۇرلىعىنا جاۋاپتى ۆيسە پرەزيدەنتى كياگابا حادسون حابارلادى. ونىڭ ايتۋىنشا قارا قۇرلىق جۇرتى توقىعزقۇمالاقتى دۇنيەجۇزىلىك كوشپەندىلەر ويىندارى ارقىلى تانىعان.

 ول افريكا حالىقتارىنىڭ وۆاري، مانكالا سىندى ۇستەل ويىندارىنا ۇقساس بولعاندىقتان ۇيرەنۋ اسا قيىنعا سوقپاعان. بۇگىندە ايماق وكىلدەرى حالىقارالىق جارىستارعا قاتىسىپ ءجۇر. ءتىپتى ونىڭ زياتكەرلىك پايداسىن ەسكەرىپ، مەكتەپتەرگە ۇيىرمە رەتىندە ەنگىزۋگە نيەتتى. وعان بيىل ەلوردادا وتكەن حالىقارالىق جارىس زور ىقپال ەتكەن.

كياگابا حادسون، دۇنيەجۇزىلىك توعىزقۇمالاق فەدەراسياسىنىڭ افريكا قۇرلىعى بويىنشا جاۋاپتى ۆيسە-پرەزيدەنتى:

- ءقازىر افريكاداعى بەنين، نيگەريا، گانا، كوت-د-يۆۋار، ەفيوپيا، تانزانيا مەن ۋگاندادا توعىز قۇمالاقشالار كوبەيىپ كەلەدى. اتالعان ەلدەردە وسى ويىنعا دەگەن قىزىعۋشىلىق ارتىپ كەلە جاتقاندىقتان، الداعى ۋاقىتتا وڭىردە قۇرلىقتىق چەمپيونات وتكىزۋدى جوسپارلاپ وتىرمىز. ءقازىر بىلىكتى باپكەرلەر از بولىپ تۇر. سوندىقتان ولاردى قازاقستان نە قىرعىزستانعا جىبەرىپ شەبەرلىكتەرىن شىڭداساق دەپ دەمەۋشىلەر ىزدەپ جاتىرمىز. 

بۋكاري يدريسسۋ، توعىزقۇمالاق ۇيرەتۋشى:

- بەنيندە توعىزقۇمالاققا قىزىعاتىندار ءقازىر ەلدەگى مادەنيەت ورتالىقتارىندا باس قوسادى. سوڭعى رەت وتكەن قالالىق جارىسقا 50 ادام قاتىستى. جەكە ءوزىم وتكىزەتىن توعىزقۇمالاق ساباقتارىنا 60-قا جۋىق وقۋشى قاتىسادى. الدا ۋاقىتتا كلۋب قۇرسام دەگەن ويىم بار. سەبەبى بۇل ويىن ادامنىڭ ويلاۋ قابىلەتىنە وتە پايدالى.