ۇشاق بورتىندا تەمەكى شەككەن قىزدارعا ايىپپۇل سالىندى.
اۋە كەمەسىنىڭ بورتىندا تەمەكى شەككەنى ءۇشىن استانا قالاسىنىڭ 20 جاستاعى تۇرعىنى اكت بويىنشا شارم-ەل-شەيح – استانا باعىتىنداعى اۋە رەيسىنەن ءتۇسىرىلىپ، كولىك پوليسەيلەرىنە بەرىلدى. جاس قىز ق ر اقبتك-نىڭ 441-بابىنىڭ 1-2-بولىگى بويىنشا اكىمشىلىك جاۋاپكەرشىلىككە تارتىلىپ، 50 ايلىق ەسەپتىك كورسەتكىش كولەمىندە ايىپپۇل سالىندى (153 150 تگ)، دەپ حابارلايدى Almaty-akshamy.kz.
ءدال وسىنداي قۇقىقبۇزۋشىلىق جاساعانى ءۇشىن تاعى ءبىر جولاۋشى قىز، ورال قالاسىنىڭ تۇرعىنى، ورال – الماتى باعىتىنداعى اۋە رەيسىنەن ءتۇسىرىلدى.
ايتا كەتەيىك، وسى جىلدىڭ باسىنان بەرى ەلىمىزدىڭ كولىك پوليسەيلەرى ءتۇرلى اكىمشىلىك قۇقىقبۇزۋشىلىقتار جاساعانى ءۇشىن اۋە رەيسىنەن 379 ازاماتتى ءتۇسىردى، ونىڭ ىشىندە اۋە كەمەسىنىڭ بورتىندا تەمەكى ونىمدەرىن تۇتىنعانى ءۇشىن 106، الكوگولدىك ىشىمدىكتەر ىشكەنى نەمەسە قوعامدىق ورىنداردا ماس كۇيىندە بولعانى ءۇشىن 204 ادام جاۋاپقا تارتىلعان.