ءىىم مالىمەتىنشە بيىل ەسىرتكى قىلمىسىنا قاتىسى بار 19 كامەلەت جاسىنا تولماعان بالا ۇستالعان. وسىعان بايلانىستى ىشكى ىستەر ورگاندارى اتا-انالارعا ۇندەۋ جاسادى، دەپ حابارلايدى almaty-akshamy.kz.
ءىىم رەسمي وكىلى شىڭعىس الەكەشيەۆ:
– كەز كەلگەن وتباسى ەسىرتكى قۇرىعىنا تاپ بولۋى مۇمكىن. جىل باسىنان بەرى 19 ءجاسوسپىرىم ەسىرتكى قىلمىستارى ءۇشىن ۇستالدى.
جاستار ەسىرتكى تاراتۋدىڭ جانە جارنامالاۋدىڭ قۇقىقتىق سالدارى تۋرالى بىلسە دە، ولاردىڭ كەيبىرى ەسىرتكىنىڭ زاڭسىز اينالىمىنان باس تارتار ەمەس.
ناشاقورلىققا قارسى يممۋنيتەت قالىپتاستىرۋدا وتباسىنىڭ ايرىقشا ءرولىن ەسكەرە وتىرىپ، ءىىم اتا-انالارعا جازعى دەمالىس قارساڭىندا بالالار ومىرىنە بارىنشا كوڭىل قويۋ كەرەكتىگىن ەسكەرتەدى.
ءوز بالالارىڭىزدىڭ ارالاساتىن ورتاسىن ءبىلۋ، ولار پايدالاناتىن ينتەرنەت-رەسۋرستاردى باقىلاۋ اسا ماڭىزدى. زاتتارىنىڭ ىشىنەن مەديسينالىق پرەپاراتتاردىڭ قورابىن، فولگا نەمەسە شىنى تۇتىكشەلەر بايقاساڭىز، ەلەۋسىز قالدىرماڭىز. مۇنىڭ ءبارى سينتەتيكالىق ەسىرتكى تۇتىنۋعا ارنالعان بولۋى ابدەن مۇمكىن.
ساباقتاعى ۇلگەرىمىنىڭ ناشارلاۋى، ساباققا بارماۋى جانە ارالاساتىن ورتاسىنىڭ وزگەرۋى اتا-انا نازارىنان تىس قالماۋى كەرەك.
اگرەسسيا، اياق استىنان كوڭىل كۇيىنىڭ وزگەرۋى، شارشاڭقى كۇيگە ءجيى ءتۇسۋى دە ەسىرتكى تۇتىنىپ جۇرگەنىنىڭ بەلگىلەرى بولۋى ىقتيمال.
بالانىڭ بويىنان ءۇش نەمەسە ودان دا كوپ وسىنداي بەلگىلەر بايقالسا، تەز ارادا شارا قولدانۋ قاجەت. اقشا جۇمساۋى جيىلەسە نەمەسە قاراجاتى كوپ بولسا، بۇل دا الاڭداۋعا تۇرارلىق ماسەلە. ويتكەنى بالانى ەسىرتكى تۇتىنۋعا عانا ەمەس، ونى تاراتۋعا دا تارتۋى مۇمكىن. ەگەر بالانىڭ تەلەفونى مەن مەسسەندجەرلەرىنەن گەولوكاسيا كورسەتىلگەن سۋرەتتەر، ءۇي قابىرعالارى مەن باعاندارداعى شتامپتاردى بايقاساڭىز، بۇل دا كۇمان تۋدىراتىن جايت. سەبەبى وندا ەسىرتكى جاسىرىلعان جەرلەر كورسەتىلۋى مۇمكىن.
نومىرلەر جانە ءتۇرلى سايتتاردىڭ سىلتەمەلەرى جازىلعان تىزىمگە، يزولەنتاعا ورالعان زاتتارعا دا نازار سالعانىڭىز ابزال.
ەسىرتكى قىلمىستارى ءۇشىن جاۋاپكەرشىلىك 16 جاستان باستالاتىنىن ەستەرىڭىزگە سالامىز.