جاڭا مەملەكەتتىك جانە جەكەمەنشىك ءبىلىم بەرۋ وبەكتىلەرىن سالۋ ەسەبىنەن ورىن تاپشىلىعى قىسقارادى.
بۇل تۋرالى الماتى قالاسىنىڭ اكىمى ەربولات دوسايەۆ وكق-دا وتكەن الماتى قالاسىنىڭ الەۋمەتتىك ەكونوميكالىق دامۋىنىڭ 5 ايداعى نەگىزگى قورىتىندىلارى تۋرالى سويلەگەن سوزىندە ايتتى، دەپ حابارلايدى Almaty-akshamy.kz.
حالىق سانىنىڭ ءبىرشاما وسۋىنە جانە جاڭا اۋماقتاردىڭ قوسىلۋىنا بايلانىستى الەۋمەتتىك ينفراقۇرىلىمنىڭ تاپشىلىعى ايتارلىقتاي قيىندىق تۋعىزۋدا.
وسى ماسەلەلەردى شەشۋ ءۇشىن قالادا «باسقارىلاتىن تاپشىلىق» ورتا مەرزىمدى ساياساتى ىسكە اسىرىلاتىن بولدى. جاڭا مەملەكەتتىك جانە جەكەمەنشىك ءبىلىم بەرۋ وبەكتىلەرىن سالۋ ەسەبىنەن ورىن تاپشىلىعى قىسقارادى.
ەربولات دوسايەۆتىڭ ايتۋىنشا، مەملەكەتتىك مەكتەپتەردىڭ باستاۋىش سىنىپتارىن فيليال رەتىندە تۇرعىن ءۇي كەشەندەرىنىڭ ءبىرىنشى قاباتتارىندا ورنالاستىرۋ تەتىگى قاراستىرىلۋدا.
«وسىلايشا، 2022 جىلدىڭ باسىنان بەرى 3 316 ورىندىق 54 جەكەمەنشىك بالاباقشا اشىلدى، وسى جىلدىڭ سوڭىنا دەيىن تاعى 1 460 ورىندىق 17 بالا باقشا، ونىڭ ىشىندە 560 ورىندىق 2 مەملەكەتتىك بالاباقشا اشىلاتىن بولادى (900 ورىندىق 15 جەكەمەنشىك بالاباقشا)»،- دەدى قالا اكىمى.
اكىمنىڭ سوزىنە جۇگىنسەك، بيىل ورتا ءبىلىم بەرۋ سالاسىندا 13،8 مىڭ ورىنعا ەسەپتەلگەن 18 وبەكتىنى پايدالانۋعا بەرۋ جوسپارلانىپ وتىر، ونىڭ ىشىندە 10 750 ورىنعا 11 جاڭا مەكتەپ (ونىڭ 5-ەۋى 7 500 ورىندىق مەملەكەتتىك مەكتەپتەر جانە 3 250 ورىندىق 6 جەكەمەنشىك مەكتەپ)، 1 270 ورىنعا 5 قوسىمشا قۇرىلىس، 1 800 ورىندىق 2 عيماراتتى ساتىپ الۋ جوسپارلانىپ وتىر (600 ورىندى №94 مەكتەپ ءۇشىن 1،8 ملرد تەڭگەگە ادىلەت كوللەدجى جانە 1200 ورىندى ناۋرىزباي اۋدانىنىڭ شۇعىلا شاعىناۋدانىنداعى Qazaq Stroy مەكتەبى).
جىلدىڭ سوڭىنا دەيىن 3-6 جاس ارالىعىنداعى بالالاردى مەكتەپكە دەيىنگى بىلىممەن قامتۋ 2،4%-كە (91%-تەن 93،4%-كە دەيىن)، مەكتەپتەردەگى وقۋشى ورىندارىنىڭ سانى 5%-كە (279،1 مىڭنان 292،9 مىڭ ورىنعا دەيىن) وسەدى.