ەلىمىزدە بالا تۋۋدىڭ وڭ ديناميكاسى بايقالادى
قازاقستاندا 9 ايدا 341 854 بالا دۇنيەگە كەلدى، دەپ حابارلايدى Almaty-akshamy.kz Egemen.kz-كە سىلتەمە جاساپ.
بۇگىن بۇكىل الەمدە حالىقارالىق بالا قۇقىقتارىن قورعاۋ كۇنى اتاپ وتىلەدى. دەنساۋلىقتى ساقتاۋ قۇقىعى نەگىزگى قۇقىقتىڭ ءبىرى.
ۆەدومستۆونىڭ مالىمدەۋىنشە، بالالاردىڭ دەنساۋلىعىن قورعاۋ مەملەكەتتىك ساياساتتىڭ باسىم باعىتىنىڭ ءبىرى، ول «سالاۋاتتى ۇلت «ءاربىر ازامات ءۇشىن ساپالى جانە قولجەتىمدى دەنساۋلىق ساقتاۋ» ۇلتتىق جوباسىندا كورىنىس تاپقان.
«ءبىزدىڭ ەلىمىزدە بالا تۋۋدىڭ وڭ ديناميكاسى بايقالادى. جەدەل دەرەكتەرگە سايكەس رەسپۋبليكادا 2021 جىلدىڭ 9 ايىندا 341 854 بالا دۇنيەگە كەلدى، بۇل وتكەن جىلدىڭ ۇقساس كەزەڭىندە تۋىلعانعا قاراعاندا 21 552 بالاعا كوپ»، - دەلىنگەن حابارلامادا.
مەملەكەت بالالاردىڭ دەنساۋلىق جاعدايىن جاقسارتۋ جانە ءسابي ءولىمىن ازايتۋ ءۇشىن جۇيەلى شارالاردى قولعا العان. مينيسترلىكتىڭ مالىمدەۋىنشە، اۋرۋلار مەن دامۋ كەمشىلىگىن ۋاقتىلى انىقتاۋ ءۇشىن 3،2 ملن بالا پروفيلاكتيكالىق تەكسەرۋدەن وتكەن.
«بالانى كىشكەنە كەزىنەن كۇتۋ ماسەلەسى بويىنشا كەڭەس بەرۋ ءۇشىن 600-دەن استام بالانى دامىتۋ كابينەتى ۇيىمداستىرىلدى. الدىن الۋ ءۇشىن ەرتە سكرينينگ جۇرگىزىلەدى. جۇكتىلىك كەزىندە قۇرساقىشىلىك ۇرىقتىڭ پرەناتالدى سكرينينگى، تۋا بىتكەن گيپوتيرەوزدى جانە فەنيلكەتونۋريانى انىقتاۋ ءۇشىن نەوناتالدى سكرينينگ جۇرگىزىلەدى. جاڭا تۋعان نارەستەلەردەگى رەتينوپاتيانى انىقتاۋ ءۇشىن وفتالمولوگيالىق سكرينينگ، اۋديولوگيالىق سكرينينگ جانە ەرتە جاستاعى بالالاردىڭ پسيحوفيزيكالىق دامۋ سكرينينگى ەنگىزىلدى»، - دەلىنگەن حابارلامادا.
سونداي-اق،17 جاسقا دەيىنگى بالالاردى جىل سايىن پروفيلاكتيكالىق تەكسەرۋ جۇرگىزىلەدى. ددۇ ۇسىنعان ءتيىمدى پەريناتالدىق تەحنولوگيالاردى، رەانيماسيانىڭ زاماناۋي ءادىسىن ىسكە اسىرۋدىڭ ارقاسىندا شالا تۋعان بالالاردىڭ ءومىر ءسۇرۋ دەڭگەيى 80%-عا دەيىن ارتتى.
جاڭا تەحنولوگيالار مەن زاماناۋي دياگنوستيكالىق جانە ەمدىك اپپاراتۋرالاردى، وكپە ءتىنىنىڭ جەتىلۋىنە ارنالعان دارىلىك زاتتاردى پايدالانا وتىرىپ، جاڭا تۋعان نارەستەلەردى رەانيماسيالاۋ جانە قارقىندى ەمدەۋ ادىستەرى ەنگىزىلدى.