قازاقستاندا جىل باسىنان 23 ەسىرتكى زەرتحاناسى انىقتالدى
بۇل تۋرالى ىشكى ىستەر مينيسترلىگى باسپا ءسوز قىزمەتىنىڭ وكىلى شۇعىلا تۇرلىبەك ءمالىم ەتتى، دەپ حابارلايدى اlmaty-akshamy.kz
ۆەدومستۆو دەرەگىنشە، جىل باسىنان بەرى پوليسيا قىزمەتكەرلەرى 23 ەسىرتكى زەرتحاناسىن انىقتاعان. جالپى، بيىل زاڭسىز اينالىمنان 110 كەلىدەن استام سينتەتيكالىق ەسىرتكى تاركىلەندى. ىشكى ىستەر مينيسترلىگىنىڭ مالىمەتىنە ساي، بۇل بىلتىرمەن سالىستىرعاندا ەكى ەسە كوپ.
ش.تۇرلىبەك ەسىرتكى زەرتحاناسىن ۇيىمداستىرىپ، كەيىن ەلدەن قاشپاق بولعان كۇدىكتى تۋرالى ايتىپ بەردى.
«ماۋسىم ايىنىڭ سوڭىندا پوليسيا قىزمەتكەرلەرى الماتى وبلىسىنىڭ ازات اۋىلىندا ەسىرتكى زەرتحاناسىن جويدى. كۇدىكتى سينتەتيكالىق ەسىرتكى جاساۋ ءۇشىن ءۇيدى جالعا العان. ول قۇقىققورعاۋ ورگاندارىنان ساقتانۋ ءۇشىن، ۇيالى تەلەفون ارقىلى باقىلاۋ مۇمكىندىگى بار جاسىرىن بەينەكامەرالار ورناتقان. قىلمىس بولعان جەرگە سوڭعى رەت ورالعاندا، پوليسيادان كۇدىكتەنىپ، ەسىرتكى، حيميالىق زاتتار مەن جابدىقتاردى تاستاپ قاشىپ كەتكەن. بارلىعى 75 گرامنان استام سينتەتيكالىق ەسىرتكى، سونداي-اق پسيحوبەلسەندى زاتتاردى سينتەزدەۋ ءۇشىن پايدالانىلاتىن 4،5 كەلىدەن استام پرەكۋرسور تاركىلەندى. جينالعان دالەلدەر، ءۇي يەسى مەن كورشىلەردىڭ ايعاقتارى كۇدىكتىنىڭ جەكە باسىن انىقتاۋعا مۇمكىندىك بەردى. ارالاساتىن ورتاسى، وعان قاتىستى باسقا دا مالىمەتتەر تەكسەرىلىپ، ءجيى بولاتىن جەرلەرى بەلگىلى بولدى.
كۇدىكتى تاعى دا ءبىر ەسىرتكى ءوندىرىسىن ۇيىمداستىرۋى مۇمكىن بولعاندىقتان، پوليسيا قىزمەتكەرلەرى ونى ءبىراز ۋاقىت باقىلاۋدا ۇستادى. ونىڭ ەلدەن قاشۋ جوسپارى بەلگىلى بولعان سوڭ، ءتارتىپ ساقشىلارى كۇدىكتىنى ەڭبەكشىقازاق اۋدانىنىڭ ايمەن اۋىلىندا ۇستادى. ءتىنتۋ بارىسىندا ودان 10 گرامم مەفەدرون الىندى»، - دەدى شۇعىلا تۇرلىبەك.