بيىل 9 ايدىڭ ىشىندە ەل كولەمىندە بەينەباقىلاۋ كامەرالارىنىڭ كومەگىمەن 9913 قىلمىستىڭ بەتى اشىلدى. بۇل تۋرالى ق ر ىشكى ىستەر ءمينيسترىنىڭ ورىنباسارى ساكەن سارسەنوۆ ءمالىم ەتتى، دەپ حابارلايدى almaty-akshamy.kz قازاقپاراتقا سىلتەمە جاساپ.
«قوعامدىق قاۋىپسىزدىكتى قامتاماسىز ەتۋدەگى ايتۋلى شارالاردىڭ ءبىرى - كوپشىلىك ورىنداردى جاپپاي بەينەباقىلاۋ كامەراسىمەن قامتاماسىز ەتۋ. بەينەباقىلاۋ كامەراسىنا تۇسكەن كەز كەلگەن قۇقىقبۇزۋشىلىق فاكتىسى سوتتا نەمەسە تەرگەۋ كەزىندە دالەل رەتىندە قولدانىلادى. بەينەباقىلاۋ جۇيەسى قىلمىستىڭ ءىزىن سۋىتپاي اشۋعا، ايعاقتاردى جيناۋعا عانا ەمەس، ونىڭ الدىن الۋعا دا كومەكتەسەدى. قازىرگى تاڭدا رەسپۋبليكا اۋماعىندا 625 مىڭنان استام بەينەباقىلاۋ كامەراسى قويىلعان. ونىڭ 100 مىڭعا جۋىعى جەدەل باسقارۋ ورتالىعىنا تيەسىلى. بيىل 9 ايدىڭ ىشىندە بەينەباقىلاۋ كامەراسىنىڭ كومەگىمەن رەسپۋبليكا بويىنشا 9 913 قىلمىس اشىلدى»، - دەدى ساكەن سارسەنوۆ ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا.
سونداي-اق، مينيستر ورىنباسارى بەينەباقىلاۋ كامەراسىنىڭ كومەگىمەن اشىلعان قىلمىستاردىڭ ءبىرىن ايتىپ ءوتتى.
«بيىل 8 قىركۇيەكتە، تۇنگى ساعات 01:30 شاماسىندا قوناقتان كەلە جاتقان پەتروپاۆل تۇرعىنىنىڭ ۇيالى تەلەفونىن بەلگىسىز بىرەۋ قولىنان جۇلىپ الىپ، موپەدكە وتىرىپ، سىبايلاسىمەن بىرگە قاشىپ كەتكەن. جابىرلەنۋشى قىلمىسكەردىڭ ءتۇرىن بايقاپ ۇلگەرمەگەن، ەسەسىنە وقيعا بەينەباقىلاۋ كامەراسىنا ءتۇسىپ قالعان. ءتارتىپ ساقشىلارى 18 جانە 15 جاستاعى ەكى ءجاسوسپىرىمدى دەرەۋ ۇستادى. ۇرلانعان زات تاركىلەندى»، - دەدى ول.