قازاقتىڭ «ەڭبەكتىڭ نانى ءتاتتى» دەگەن ناقىل ءسوزى قاشان دا وزەكتى. شىنىمەن دە، كەيدە قاراپايىم ەڭبەك ادامدارىنىڭ ەڭبەگى ەلەنبەي قالىپ جاتادى. دەگەنمەن، ولاردىڭ قوعامعا قوسقان ۇلەسى وتە زور. بۇگىندە تۇرمىس قامىن ويلاپ، تاڭنىڭ اتىسى مەن كۇننىڭ باتىسى جۇمىس ىستەيمىز. اسىرەسە، ۇلكەن قالالاردا جان باعۋ وڭاي ەمەس. قوعامنىڭ ەڭ قاجەتتى قىزمەتتەرىنىڭ ءبىرى – قوعامدىق كولىك، ال جولاۋشىلاردى كەرەك جەرىنە جەتكىزۋ وسى سالانىڭ ماماندارىنىڭ ارقاسىندا جۇزەگە اسادى. ءبىز وسىعان بايلانىستى «الماتىەلەكتروترانس» كوممۋنالدىق №3 اۆتوپاركتەگى 66-شى باعىتتىڭ جەتەكشىسى، اۆتوبۋس جۇرگىزۋشىسى ەرجان قارابايەۆپەن سۇحباتتاستىق.
«ەڭبەكتىڭ نانى ءتاتتى...»
— جۇرگىزۋشىلىكتى قالاي باستادىڭىز؟
— بالا كەزىمدە «يكارۋس» اۆتوبۋسىن جۇرگىزەتىن ۇلكەن ءبىر گرەك كىسىنى كوردىم. ەڭسەلى، دەنەسىن تۇك باسقان، كوكىرەك تۇسىن اشىپ جۇرگەن، ۇستىنە قويۋ-قىزعىلت جەيدە كيگەن سول جۇرگىزۋشى باسىمنان سيپاپ، «جۇرگىزۋشى بولاسىڭ با؟» دەپ، ماعان ءۇش رۋبل بەردى. سول كۇننەن باستاپ، اۆتوبۋس جۇرگىزۋشىسى بولۋدى قالادىم.
— اۆتوبۋس جۇرگىزۋشىسىنىڭ ءبىر كۇنى قالاي وتەدى؟
— ءبىزدىڭ كۇنىمىز كوڭىل-كۇيىمىزگە بايلانىستى وتەدى. قوعامدىق كولىكتە ءتۇرلى ادامداردى كەزدەستىرەسىز. بىرەۋلەر جۇمىسقا اسىقسا، بىرەۋلەر بالاباقشاعا بارادى، تاعى بىرەۋلەرى ەمدەلىپ قايتقان جاندار. ءارتۇرلى ساناتتاعى جولاۋشىلاردىڭ ىشىندە جاعىمدى ادامداردى كورىپ، جاقسى تىلەكتەر ەستىسەك، كوڭىلىمىز كوتەرىلىپ قالادى. قايتىپ كەلە جاتقاندا شارشاعان جولاۋشىلاردى كورەمىز، سوندىقتان كۇنى بويى ءارتۇرلى سەزىمدەر تولقىنىندا بولامىز. كەيدە ىشىمدىك ۇرتتاپ الاتىندار دا كەزدەسەدى، ولاردىڭ ءيىسى اۆتوبۋس ىشىندە شىداتپاي، جۇمىستى اۋىرلاتىپ جىبەرەدى. ءبىراق باستى ماقساتىمىز – جولاۋشىلاردى امان-ەسەن جەتكىزۋ.
وتباسىم ءۇشىن ەڭبەكتەنەمىن
— بۇل جۇمىسقا تاباندىلىق قاجەت پە؟
— ارينە، بۇل جۇمىستا تاباندىلىق وتە ماڭىزدى. 16-17 ساعات بويى قوعامدىق كولىكتى جۇرگىزۋ وڭاي ەمەس. تاڭعى ساعات 4:30-دا ويانىپ، تۇنگى ساعات 23:00-گە دەيىن جۇمىس ىستەيسىز. بىزگە وسى ۇزاق جۇمىس كۇنىنە ءتوزۋ ءۇشىن ۇلكەن كۇش پەن توزىمدىلىك كەرەك. جۇمىستاعى كۇيزەلىستەن جۇيكە شارشاپ، دەنساۋلىققا زيان كەلۋى مۇمكىن. مەنىڭ دە مۇگەدەك بالالارىم بار، ولاردى اسىراۋ، كۇتىپ-باعۋ كەرەك. ءبارىن توزىمدىلىكپەن كوتەرىپ، وتباسىمىز ءۇشىن ەڭبەكتەنەمىز.
«جۇرگىزۋشىنىڭ جاعدايى جاقسارسا ەكەن»
— كاسىبىڭىزدىڭ قيىندىعى نەدە؟
— بۇل جۇمىستا ەڭ باستىسى – جۇيكە مىقتى بولۋى كەرەك. ءار ءتۇرلى ساتتەرگە دايىن بولۋ قاجەت. بىزگە قالاداعى Car city ايماعىندا اۆتوبۋس توقتايتىن ارنايى تۇراق بار، وندا №66، 65، 122، 110، 236 باعىتىنداعى اۆتوبۋستار توقتايدى. سول جەرگە جۇرگىزۋشىلەرگە ارنالعان اسحانا مەن دەمالىس ورىندارى جاسالسا دەگەن تىلەگىمىز بار. بۇل سۇرانىستى بيلىك وكىلدەرىنە جەتكىزگىمىز كەلەدى.
سابىرلى بولعان وزادى
— ەرەكشە ەستە قالعان وقيعالار بار ما؟
— بىرنەشە جىل بۇرىن «يپپودروم» بازارىنا ۇلكەن اۆتوبۋسپەن باردىق. كەدەننىڭ كۇشەيگەن كەزى ەدى، اۆتوبۋسىمىزدان ءورت شىعىپ، جولاۋشىلاردى امان-ەسەن سىرتقا شىعارىپ ۇلگەردىم. قيىندىققا شىداپ، ادامداردى قورعاپ قالعانىم ءۇشىن ءوزىمدى باقىتتى سەزىنەمىن.
تاعى ءبىر وقيعادا اۆتوبۋستا قالتا ۇرىلارىن ۇستاپ، ولاردى سۋىق قارۋلارىمەن بىرگە سۇلاتقان كەزدەر بولعان. العاشىندا قاراپايىم جۇرگىزۋشى بولسام دا، قايسارلىق كورسەتىپ، تالاي قيىندىقتان ءوتتىم.
«ساقتانساڭ، ساقتايدى!»
— قوعامدىق كولىك جۇرگىزۋشىسى بولۋدى ارماندايتىن جاستارعا قانداي كەڭەس بەرەر ەدىڭىز؟
— جاس جۇرگىزۋشىلەرگە ەڭ باستى كەڭەس – جاۋاپكەرشىلىك. قوعامدىق كولىكتە ءار ادامنىڭ تاعدىرى سەنىڭ قولىڭدا تۇرعانداي سەزىنۋ قاجەت. كولىك جۇرگىزۋدە تەك ءوزىڭ ءۇشىن عانا ەمەس، جولاۋشىلار ءۇشىن دە ساق بولىپ، ۇقىپتىلىق تانىتۋ كەرەك. سوندىقتان جۇمىسقا دەگەن ادالدىق پەن ادامدارعا دەگەن قۇرمەت الدىڭعى ورىندا تۇرادى.
قورىتىندىلاي كەلە، اۆتوپارك باسشىلىعىنا، ارىپتەستەرىمە جانە وتباسىمنىڭ قولداۋىنا ۇلكەن ريزاشىلىعىمدى بىلدىرەمىن. ەڭ باستىسى، دەنىمىز ساۋ بولسىن، العا قويعان ماقساتتارعا قول جەتكىزىپ، ەڭبەكتىڭ قىزىعىن كورە بىلەيىك.