بۇگىن الماتى قالاسىنىڭ وڭىرلىك كوممۋنيكاسيالار قىزمەتىنىڭ الاڭىندا Almaty Students Week اكسياسىنىڭ باستالۋىنا ارنالعان باسپا ءسوز كونفەرەنسياسى ءوتتى، دەپ حابارلايدى aqshamnews.kz
نەگىزگى سپيكەرلەر رەتىندە الماتى قالاسى جاستار ساياساتى باسقارماسىنىڭ جاستاردى الەۋمەتتەندىرۋ جانە جاستار باستامالارىن قولداۋ ءبولىمىنىڭ باسشىسى نۇرسۇلتان بەكقايىروۆ جانە قازاق ۇلتتىق قىزدار پەداگوگيكالىق ۋنيۆەرسيتەتىنىڭ ستۋدەنتتىك ومبۋدسمەنى نۇرباقىت الىبەك قاتىستى.
نۇرسۇلتان بەكقايىروۆ اتاپ وتكەندەي، الماتى - قازاقستاننىڭ ەڭ ءىرى ستۋدەنتتىك ورتالىعى، وندا 199 مىڭنان استام ستۋدەنتتى وقىتاتىن 35 جوو ورنالاسقان، ونىڭ 124 مىڭنان استامى — وزگە قالالاردان كەلگەندەر.
جىل سايىن، 17 قاراشادا بۇكىل الەمدە 1946 جىلى دۇنيەجۇزىلىك ستۋدەنتتەر كونگرەسىندە قۇرىلعان حالىقارالىق ستۋدەنتتەر كۇنى اتاپ وتىلەدى. وسى كۇن قارساڭىندا، 11-17 قاراشا ارالىعىندا الماتى قالاسىنىڭ جاستار ساياساتى باسقارماسى Almaty Students Week فەستيۆالىن وتكىزەدى.
«فەستيۆالدىڭ ماقساتى - ستۋدەنتتەر ءۇشىن بەلسەندى جانە قولداۋشى ورتا قۇرۋ، تالانتتى جاستار مەن بولاشاق پىكىر كوشباسشىلارىن انىقتاۋ. فەستيۆال سونىمەن قاتار ۋنيۆەرسيتەتارالىق ءوزارا ءىس-قيمىلدى نىعايتۋعا جانە ءارتۇرلى فاكۋلتەتتەر مەن وقۋ ورىندارىنىڭ ستۋدەنتتەرى اراسىندا دوستىق جانە ىسكەرلىك بايلانىستار قۇرۋعا باعىتتالعان. ءبىلىم مەن يدەيالارمەن الماسۋعا ارنالعان مۇنداي پلاتفورما كاسىپقويلاردىڭ جاڭا بۋىنىن قالىپتاستىرا وتىرىپ، بىرلەسكەن جوبالار مەن باستامالار ءۇشىن نەگىز بولا الادى»، - دەپ اتاپ ءوتتى نۇرسۇلتان بەككايىروۆ.
«Almaty Students Week» نەگىزگى اسپەكتىسى - ستۋدەنت جاستاردىڭ بىرلىگى جانە پاتريوتتىق رۋحىن تاربيەلەۋ. فەستيۆال اياسىندا 17 مىڭنان استام جاستى قامتيتىن 30 ءتۇرلى ءىس-شارا وتەدى.
«Almaty Students Week» — بۇل جاي عانا مەرەكە ەمەس، قازىرگى زامانعى سىن-قاتەرلەردى شەشۋگە دايىن جانە ەلدىڭ دامۋىنا ەلەۋلى ۇلەس قوسا الاتىن نەعۇرلىم بەلسەندى جانە ۇيىمشىل ستۋدەنتتەر قاۋىمداستىعىن قۇرۋ جولىنداعى ماڭىزدى قادام»، - دەپ قورىتىندىلادى قازاق ۇلتتىق قىزدار پەداگوگيكالىق ۋنيۆەرسيتەتىنىڭ ستۋدەنتتىك ومبۋدسمەنى نۇرباقىت الىبەك.