جۇرگىزۋشى كۋالىگىنەن ايىرىلعان شەتەلدىك الماتىدا تاكسي قىزمەتىمەن اينالىسقان

الماتىدا شەتەلدىك كولىك جۇرگىزۋ قۇقىعىنان ايىرىلعانىنا قاراماستان جولاۋشىلار تاسىمالداعان.

 الماتى قالاسىندا پاترۋلدىك پوليسيا قىزمەتكەرلەرى جولاۋشىلار تاسىمالىمەن زاڭسىز اينالىسقان شەتەلدىك ازاماتتى انىقتادى، دەپ حابارلايدى aqshamnews.kz.

Polisia.kzء-تىڭ مالىمەتىنشە، «تاسىمالداۋشى» جەدەل-پروفيلاكتيكالىق ءىس-شاراسى بارىسىندا ءتارتىپ ساقشىلارى «Hyundai» ماركالى اۆتوكولىكتى توقتاتتى. كولىكتى كورشىلەس ەلدىڭ ازاماتى باسقارعانى بەلگىلى بولدى. ول تانىمال تاسىمالداۋ پلاتفورمالارىنىڭ بىرىندە وزگە ادامنىڭ اتىمەن تىركەلىپ، زاڭسىز تاكسي قىزمەتىن اتقارىپ جۇرگەن. 

تەكسەرۋ كەزىندە ونىڭ بۇرىن جول-كولىك وقيعاسىنا كىنالى بولىپ، جۇرگىزۋشى كۋالىگىنەن ايىرىلعانى انىقتالدى.

– قازىرگى ۋاقىتتا قۇقىق بۇزۋشى ارنايى ۋاقىتشا ۇستاۋ يزولياتورىنا قامالدى. ونىڭ قازاقستان اۋماعىنان شىعارۋ ماسەلەسى قارالۋدا. كولىك قۇرالى ايىپپۇل تۇراعىنا قويىلدى، – دەپ مالىمدەدى الماتى قالالىق پوليسيا دەپارتامەنتى جەرگىلىكتى پوليسيا قىزمەتى باسقارماسى باستىعىنىڭ ورىنباسارى تيمۋر نوعايبايەۆ.

ايتا كەتەيىك، الماتىدا جولاۋشىلار تاسىمالى سالاسىنداعى زاڭ بۇزۋشىلىقتاردى بولدىرماۋ، قوعامدىق كولىكتەردىڭ قاۋىپسىزدىگىن ارتتىرۋ جانە ازاماتتاردىڭ قۇقىقتارىن قورعاۋ ماقساتىندا «تاسىمالداۋشى» رەسپۋبليكالىق ءىس-شاراسى وتكىزىلۋدە. ءىس-شارا اياسىندا قوعامدىق كولىكتەردەگى كەز كەلگەن زاڭسىزدىققا «مۇلدەم توزبەۋشىلىك» ۇستانىمى نەگىزىندە قاتاڭ شارالار قولدانىلۋدا.