پرەمەر-مينيستر اۆتومەكتەپتەردى ەسەپكە الۋدى تاپسىردى.
ولجاس بەكتەنوۆ اۆتومەكتەپتەرگە قويىلاتىن تالاپتاردىڭ تومەندەۋى جۇرگىزۋشىلەردى دايارلاۋ ساپاسى مەن جۇرگىزۋ مادەنيەتىنە تەرىس اسەر ەتكەنىن ايتتى، دەپ حابارلايدى aqshamnews.kz ۇكىمەتتىڭ باسپا ءسوز قىزمەتىنە سىلتەمە جاساپ.
"اۆتوكولىكتىڭ تەحنيكالىق جاي-كۇيى جول قوزعالىسىنىڭ قاۋىپسىزدىگىنە تىكەلەي اسەر ەتەدى. جىل سايىن ەلىمىزدەگى اۆتوپارك سانى ءوسىپ جاتىر. ال اۆتوكولىكتەردى تەحنيكالىق تەكسەرۋ ساپاسىز جۇرگىزىلەدى"، - دەدى بەكتەنوۆ.
ول تەحنيكالىق قىزمەت كورسەتۋ ورتالىقتارى باس پايداسىن عانا ويلاپ، جۇمىس ىستەيتىنىن ايتتى.
"جول ۇستىندەگى قاۋىپسىزدىك جانە ادامداردىڭ ءومىرىن ساقتاۋ ماسەلەسى جەكەلەگەن تۇلعالاردىڭ مۇددەسىنەن بيىك تۇرۋعا ءتيىس. تەحنيكالىق تەكسەرۋ ورتالىقتارىنىڭ جۇمىسىن جونگە كەلتىرەتىن ۋاقىت جەتتى. كولىك مينيسترلىگىنە كولىك قۇرالدارىنا تەحنيكالىق تەكسەرۋ جۇرگىزۋ ساپاسىن ءتيىمدى باقىلاۋ تەتىگىن ازىرلەۋدى تاپسىرامىن"، — دەپ اتاپ ءوتتى بەكتەنوۆ.
سونىمەن قاتار، ۇكىمەت باسشىسى ءقازىر وقۋ ورتالىقتارىن اشۋ ءۇشىن ليسەنزيالار مەن رۇقساتتار تالاپ ەتىلمەيتىنىن، سوندىقتان ولاردىڭ كوپشىلىگىندە قاجەتتى ماتەريالدىق بازا جوق ەكەنىن دە مالىمدەدى.
"بۇگىنگى تاڭدا ساپاسىز دايىندىق ءۇشىن اكىمشىلىك جاۋاپكەرشىلىكتى الىپ تاستاعاندىقتان، وقۋ پروسەسى كوبىنەسە ءفورمالدى تۇردە جۇزەگە اسىرىلادى. ىشكى ىستەر مينيسترلىگىنە مۇددەلى مەملەكەتتىك ورگاندارمەن بىرلەسىپ بارلىق اۆتومەكتەپتى ەسەپكە الۋ تاپسىرىلدى. سونداي-اق حالىقارالىق تاجىريبە تالدانادى جانە قاجەت بولعان جاعدايدا جۇرگىزۋشىلەردى دايارلاۋ جانە جۇرگىزۋشى كۋالىگىن الۋ تاسىلدەرى قايتا قارالادى"، - دەدى پرەمەر-مينيستر.