مەگاپوليستەگى «ارمان» كينوتەاترىندا «جۇپار جۇرەك» كوركەم ءفيلمىنىڭ تۇساۋكەسەرى ءوتىپ، ەلىمىزدىڭ بارلىق كينوتەاترىنىڭ ۇلكەن ەكرانىنا جول تارتتى.
«جۇپار جۇرەك» – تۇرمەدە وتىرىپ شىققان، ىشكىلىككە جاقىن، قاتىگەز ءارى ابيۋزەر ساماتتىڭ (رولدە ەرجان نۇرىمبەت) جۇرەك ترانسپلانتاسياسىنان كەيىنگى وزگەرىستەرىن بەينەلەيتىن پسيحولوگيالىق دراما.
جۇرەگىندە اقاۋى بار وعان جول اپاتىنان كوز جۇمعان جاس جىگىتتىڭ جۇرەگى سالىنادى. دونور بولعان ءمۇعالىم جىگىتتىڭ اتا-اناسى مارقۇم ۇلىنىڭ تىم بولماسا جۇرەگىنىڭ ءدۇرسىلىن ەستىگىسى كەلىپ ساماتتىڭ ءۇيىنىڭ ەسىگىن قاعادى. ال سامات بولسا ول قىزمەتىن اقشاعا ساتادى. بالاسىن سارعايا ساعىنىپ جۇرگەن اكە-شەشە، ارينە، بۇل تالاپقا كونەدى.
ارادا ءبىراز ۋاقىت وتكەندە سامات وزىندەگى ەلەۋلى وزگەرىستەردى بايقاي باستايدى. ال وعان دونور بولعان جىگىت وتە مەيىرىمدى، قۇستارعا ۇيشىك جاساۋدى جانى سۇيگەن، ىزگىلىكتى مۇرات ەتكەن باستاۋىش سىنىپ ءمۇعالىمى بولاتىن...
– فيلم يدەياسى كەۋدەسىنە دونوردىڭ جۇرەگى سالىنعان ادامنىڭ جانە وعان ءومىر سىيلاعان مارقۇمنىڭ تۋىستارىنىڭ سۋرەتىن كورگەندە تۋىندادى. مەن الدىمنان شىعا كەلگەن سول سۋرەتكە ءبىراز تەسىلىپ قاراپ قالدىم. سول كورىنىستىڭ كوركەم فيلمگە سۇرانىپ تۇرعانىن ۇقتىم. بۇل – كينوزالدا پوپكورن جەپ وتىرىپ كورە سالاتىن فيلم ەمەس، ۇلكەندى دە، كىشىنى دە ويلاندىراتىن، ادام بولىپ ءومىر سۇرۋگە، جۇرەكتى ساقتاۋعا ۇندەيتىن، ادامگەرشىلىكتى دارىپتەيتىن كارتينا دەپ بىلەمىن. مەن بۇل تۋىندىمدا كوپ سوزگە ەمەس، ساحنالىق ىس-ارەكەتتەرگە كوبىرەك ءمان بەردىم، – دەيدى «جۇپار جۇرەك» كوركەم ءفيلمىنىڭ رەجيسسەرى ماكسيم قوداروۆ.
كينوكارتينا ترانسپلانتولوگيانى عانا ەمەس، ادامنىڭ ىشكى كۇرەسى، وتباسىنداعى داعدارىس، تۇرمىستىق زورلىق-زومبىلىق، بالالار اراسىنداعى بۋللينگ ماسەلەلەرىن دە قوزعايدى.
ساماتتىڭ جارى فاتيما (رولدە اينۇر بەرمۇحامبەتوۆا) – ەڭبەگىنە ادال قاراپايىم مەدبيكە. كۇيەۋىنىڭ بارلىق قاتىگەزدىگىنە، سۇيەگىنەن وتەر بالاعات سوزدەرىنە، ەتىنە باتقان تاياعىنا شىداپ كەلە جاتقان، ۇلىنىڭ ءبۇتىن وتباسىندا وسكەنىن قالايتىن ايەل. ال كىشكەنتاي ءمادي – بالا بولىپ جارقىراپ كۇلمەيتىن، اكە مەيىرىمىن كورمەگەن، ىلعي قاتارلاستارىنىڭ مازاعىنا ۇشىراپ جۇرەتىن، سۋرەت سالسا دا تەك قارا ءتۇستى بوياۋلارعا جاقىن بالدىرعان.
مىنە، كينوكارتينا وسىنداي شيەلەنىستى ساحنالارعا تولى.
– بۇل – ماكسيمنىڭ تىرناقالدى دەبيۋتتىك جۇمىسى. ءتۇسىرىلىم جۇمىستارى باستالعاندا ونىڭ ايتقان سوزدەرى ءالى ەسىمدە. «مەنىڭ قاعازداعى كەيىپكەرلەرىم ءتىرىلىپ كەلە جاتىر. ولارعا سىزدەر جان ءبىتىرىپ جاتىرسىزدار» دەپ بالاشا قۋانعانى بار. ارينە، بارىمىزدى سالدىق. ونىڭ ۇستىنە ءتۇسىرىلىم الاڭىنان مىقتى وپەراتور قازبەك ءامىرجانوۆتى كورگەندە قوبالجۋ دا ازايىپ، جانىپ سالا بەردىك. بۇل – الەۋمەتتىك-پسيحولوگيالىق دراما. جۇرەك دونورلىعىنان باستالعان وقيعا تالاي جۇرەككە وي سالادى دەپ سەنەمىن. ەندىگى باعاسىن وزدەرىڭىز بەرەسىزدەر، قىمباتتى كورەرمەندەر! – دەيدى وتاندىق بەلگىلى اكتەر باقىتجان الپەيىسوۆ.
ءفيلمدى «اليجانفيلم» ستۋدياسى مادەنيەت جانە اقپارات مينيسترلىگىنىڭ قولداۋىمەن تۇسىرگەن. اتقارۋشى پروديۋسەر – ارمان بورانبايەۆ، رەجيسسەرى جانە سەناريستى – ماكسيم كوداروۆ، قويۋشى-وپەراتور – قازبەك ءامىرجانوۆ، باستاما پروديۋسەرى – ساين عابدۋلين.
