ءجۇن وڭدەۋشىلەرگە مەملەكەت جاردەمدەسەدى

ءجۇن وڭدەۋ كاسىپورىندارىنىڭ قۇرىلىسىنا كەتكەن شىعىندى ينۆەستيسيالايتىن قاراجات كولەمى 868 ملن تەڭگەدەن اسپاۋى كەرەك. مەملەكەت سونىڭ 25 پايىزىنا سۋبسيديا بەرەدى. «مەملەكەتتىك ساتىپ الۋ تۋرالى» زاڭ جوباسىنا وسىنداي وزگەرىس ەنگىزىلمەكشى، -دەپ حابارلايدى Almaty-akshamy.kz. قازاقپاراتقا سىلتەمە جاساپ. 

بۇل تۋرالى پرەمەر-مينيستر ءاليحان سمايىلوۆ ءماجىلىس دەپۋتاتتارىنىڭ ساۋالىنا جولداعان جاۋابىندا ايتتى.

«مەملەكەتتىك ساتىپ الۋ تۋرالى» زاڭ جوباسىنىڭ رەتتەۋشىلىك ساياساتتىڭ كونسۋلتاتيۆتىك قۇجاتىمەن وتاندىق تاۋار وندىرۋشىلەردى قولداۋ، سونداي-اق ساپالى تاۋارلاردى ساتىپ الۋ ماقساتىندا تاپسىرىس بەرۋشىگە وتاندىق ءونىم بەرۋشىلەر وندىرەتىن بىرنەشە تاۋارلاردىڭ فيرمالىق اتاۋلارىن كورسەتۋگە مۇمكىندىك بەرۋ كوزدەلگەن. قازىرگى كەزدە اتالعان زاڭ جوباسى مۇددەلى مەملەكەتتىك ورگاندارمەن كەلىسىلىپ جاتىر. ءوز كەزەگىندە ءجۇندى وڭدەۋ سالاسىن دامىتۋ ءۇشىن ينۆەستيسيالىق سالىمدار كەزىندە اگروونەركاسىپتىك كەشەن سۋبەكتىسى شەككەن شىعىستاردىڭ ءبىر بولىگىن وتەۋ بويىنشا سۋبسيديالاۋ قاعيدالارى شەڭبەرىندە جاڭا كاسىپورىنداردى سالۋ جانە جۇمىس ىستەپ تۇرعاندارىن جاڭعىرتۋ كەزىندە ءجۇن جۋۋ كاسىپورىندارىنىڭ شىعىندارىن وتەۋ كوزدەلگەن. ءجۇن وڭدەۋ كاسىپورىندارى قۇرىلىسىنىڭ ەڭ جوعارى رۇقسات ەتىلگەن قۇنى 868 ملن تەڭگەنى، كەڭەيتۋ 430 ملن تەڭگەنى قۇرايدى. ينۆەستيسيالىق سالىمداردى وتەۋ ۇلەسى 25% قۇرايدى»، - دەلىنگەن جاۋاپتا.

سونداي-اق، ۇكىمەت باسشىسىنىڭ ايتۋىنشا، ءجۇن دايىنداۋشى ۇيىمدارعا مەملەكەتتىك قولداۋ رەتىندە ءجۇن قىرقۋ پۋنكتەرىن، جىلجىمالى قىرقۋ پۋنكتىن، قوي قىرقاتىن ەلەكترلىك مەحانيكالىق قۇرال-سايمانداردى 25 % مولشەردە سۋبسيديالاۋ قاراستىرىلعان.

«بۇدان باسقا، اۋىل شارۋاشىلىعى جانۋارلارىنىڭ ءجۇنىن وڭدەۋ تاۋارلارى اگروونەركاسىپتىك كەشەن سۋبەكتىلەرىنە كرەديت بەرۋ، سونداي-اق اۋىل شارۋاشىلىعى جانۋارلارىن، تەحنيكاسى مەن تەحنولوگيالىق جابدىعىن ساتىپ الۋعا ليزينگ كەزىندە سىياقى مولشەرلەمەلەرىن سۋبسيديالاۋ قاعيدالارىنىڭ اۋىل شارۋاشىلىعى ءونىمىن ءوندىرۋ جانە (نەمەسە) وڭدەۋ سالاسىنداعى باسىم جوبالار بويىنشا كرەديت جانە قارجىلىق ليزينگ بەرىلەتىن تاۋارلار تىزبەسىنە ەنگىزىلگەن. مەملەكەتتىك بيۋدجەتتەن «ونەركاسىپتى دامىتۋ قورى» اق قۇرالدارى ارقىلى 3% كرەديتتىك مولشەرلەمەمەن جەڭىل ونەركاسىپتىڭ ينۆەستيسيالىق جوبالارىن قارجىلاندىرۋ ءۇشىن 50 ملرد تەڭگە ءبولىندى»، - دەپ جازادى ءاليحان سمايىلوۆ.