ەڭبەك ادامى
جۇمىسسىزدىق – ءالى دە كۇن تارتىبىندە تۇرعان وزەكتى تاقىرىپ. وسى ماسەلەنىڭ ءتۇيىنىن شەشۋ ماقساتىندا قۇرىلعان حالىقتى جۇمىسپەن قامتۋ ورتالىعى جۇيەلى جۇمىستار اتقارىپ كەلەدى.
ماسەلەن، مەكەمە قالادا بوس جۇمىس ورىندارى جارمەڭكەسىن ءجيى ۇيىمداستىرادى. سونداي-اق، باسقارما ماماندارى جۇمىس ىزدەپ جۇرگەن جاندارعا تۇيىندەمەنى قالاي تولتىرۋ كەرەكتىگىن، ونى مەكەمە-كاسىپورىندارعا قالاي ءوتىمدى ەتىپ ۇسىنۋ جولدارىن ۇيرەتەدى. سونىمەن قاتار، «بىزگە كەلىڭىز، جۇمىس بار» دەپ شاقىراتىن كاسىپورىندار مەن ماماندىق تۇرلەرىن جالپىعا قولجەتىمدى اقپارات رەسۋرستارىنا، گازەت، سايتتارعا، ونىڭ ىشىندە ەnbek.kz پورتالىنا جۇيەلى تۇردە جاريالاپ وتىرادى. ايتارلىقتاي ناتيجەلەر بار. ماسەلەن، بىلتىر الماتى بويىنشا 19 125 جۇمىسسىز ازامات تۇراقتى جۇمىسپەن قامتاماسىز ەتىلدى. ال بيىل جىل باسىنان بەرى 2500-دەن استام ادام جۇمىس تاپقان. ودان تىس، الەۋمەتتىك، قوعامدىق جۇمىستارعا تارتىلىپ، وتباسىلىق-تۇرمىستىق جاعدايىن جاقسارتىپ جاتقان ازاماتتار دا كوپ.
جالپى، ەڭبەك نارىعىندا قىزمەت كورسەتۋ سالاسى مەن قۇرىلىس ماماندارىنا سۇرانىس جوعارى. اتاپ ايتساق، ساتۋشى، تىگىنشى، مەنەدجەر، مەرچەندايزەر، كاسسير، كونترولەر، كۇزەتشى، قۇرىلىس جۇمىسشىلارىن، بەتون قۇيۋشى، جول جۇمىسكەرلەرىن، جۇرگىزۋشى، كونديتەر، اسپاز، داياشى، جۇرگىزۋشىلەر ىزدەيتىن مەكەمەلەر كوپ. ودان سوڭ تەحنولوگيا سالاسى بويىنشا پروگرامميستەرگە، جۇيەلىك اكىمگەرلەرگە سۇرانىس بار. قالادا كەيىنگى ۋاقىتتا بالاباقشالار كوپتەپ اشىلا باستاعاندىقتان، تاربيەشىلەر دە كەرەك. ال ءىرى كومپانيالار ەسەپشى، قارجى ماماندارىن كوبىرەك ىزدەيدى. ەڭ ءجيى جۇمىس ۇسىناتىن جانە «ەكى قولعا ءبىر كۇرەك ىزدەپ» جۇرگەن ادامداردى تۇراقتى جۇمىسپەن قامتاماسىز ەتەتىن مەكەمەلەر تۋرالى ايتا كەتەر بولساق، ولاردىڭ قاتارىندا «ماگنۋم»، «سۋلپاك»، «اقساي نان»، «داستارحان»، «وبيس» جاۋاپكەرشىلىگى شەكتەۋلى سەرىكتەستىكتەرى جانە «الماتى جىلۋ جۇيەسى» اق مەن «الماتىەلەكتروترانس» بار.
ءبىز الىستان ەمەس، ۇيىندە وتىرىپ-اق مەملەكەتتىك ەnbek.kz سايتى ارقىلى الماتىدان تۇراقتى جۇمىس تاپقان جاس مامان مارات حاسەنوۆتى سوزگە تارتقان بولاتىنبىز.
– وسى قالاداعى كونسەرۆاتوريانى بىتىرگەنمىن. ەل جاقتا، قىزىلوردا وبلىستىق مادەنيەت ۇيىندە ءبىراز جۇمىس ىستەپ كەلدىم. باسىمىز جاس دەگەندەي، ۇلكەن قالادا باعىمدى سىناپ كورمەككە الماتىعا تابان تىرەگەن بولاتىنمىن. ارينە، باستاپقىدا جۇمىس تاپپاسام قالاي بولادى دەگەن ازداعان قورقىنىش بولدى. ءبىراق تابيعاتىمنان تاۋەكەلشىل ادام بولعاندىقتان، سەنىمگە، ديپلومىما كوبىرەك يەك ارتتىم. جاسىراتىنى جوق، جارتى جىلداي جۇمىسسىز ءجۇرىپ قالدىم. ماماندىعىما ساي جۇمىس تاپپادىم. بۇرىنعى جۇمىسىمدى ەnbek.kz سايتى ارقىلى تاپقان بولاتىنمىن. بۇل جولى دا سول مەملەكەتتىك پورتالعا جۇگىندىم. №72 جالپى ءبىلىم بەرەتىن مەكتەپتىڭ مۋزىكا ءپانى ءمۇعالىمى ۆاكانسياسى تابىلا كەتتى. اڭگىمەلەسۋگە شاقىردى، كەلدىم، قابىلداندىم. جاڭا وقۋ جىلىنان بەرى وسىندا ەڭبەك ەتىپ ءجۇرمىن. ۇجىمعا ءسىڭىسىپ كەتتىم. بارىنەن دە تاڭەرتەڭ كىشكەنتاي دوستارىما اسىعىپ جەتەمىن. قازىرگى بالالار باياعى ءبىز سياقتى ەمەس، ويىن، پىكىرىن، جاقسى كورىپ تۇرعانىن اشىق بىلدىرەدى. ءبارى سەنى ەسىكتەن كورگەننەن جاپاتارماعاي جۇگىرىپ كەلىپ، قۇشاقتاپ، ءبىز ءسىزدى ساعىندىق دەپ امانداسقاندا، ەلجىرەپ كەتەسىڭ. جۇمىسىڭنان شابىت الۋدىڭ ءوزى ءبىر عانيبەت! بويىمداعى بار جاقسىنى سول ارمانشىل، بىلىمگە قۇشتار ورەندەرگە سارقىپ بەرگىم كەلىپ تۇرادى، – دەيدى توعىز اسپاپتا ەركىن وينايتىن جاس مامان، مۋزىكا پەداگوگى مارات بالتاباي ۇلى.
ايتپاقشى، مارات اينالاسىندا جۇرگەن بىرنەشە جىگىتكە جۇمىستى تانىستارىن جاعالاپ ەمەس، ەnbek.kz سايتى ارقىلى ىزدەۋگە كەڭەس بەرىپ جۇرگەنىن جانە بىرنەشە تانىسى جۇمىستى سولاي تاپقانىن دا ايتىپ قالدى. ءيا، ىزدەگەن ادام – تابادى.