مەملەكەت باسشىسى قاسىم-جومارت توقايەۆ ءوزىنىڭ قىركۇيەك ايىنداعى قازاقستان حالقىنا جولداۋىندا 2025 جىلدى «جۇمىسشى ماماندىقتارى جىلى» دەپ جاريالاعان ەدى. بۇل باستامانى سالا وكىلدەرى جۇمىسشى ماماندىعىنىڭ بەدەلىن ارتتىرىپ قانا قويماي، تەحنيكالىق جانە كاسىپتىك ءبىلىم بەرۋ جۇيەسىنىڭ رەفورماسىنىڭ ىسكە اسۋىنا جاسالىپ وتىرعان قولداۋ دەپ قابىلداپ وتىر. ءساتىن سالسا، وسى جىلى مارتەبەلى ماماندىق يەلەرىنىڭ مەرەيى كوتەرىلىپ، سان قىرلى سالانىڭ تامىرىنا قان جۇگىرەتىن بولدى.
– كاسىپتىك ءبىلىم بەرۋ سالاسىنا رەفورما جاساۋ – ايرىقشا وزەكتى ماسەلە. بۇل – ەكونوميكانىڭ ءوسىمىن قامتاماسىز ەتۋ جانە ينۆەستيسيالىق تارتىمدىلىعىن ارتتىرۋ ءۇشىن اسا قاجەت قادام. مەن 2025 جىلدى «جۇمىسشى ماماندىقتارى جىلى» دەپ جاريالاپ، وسى ۋاقىت ىشىندە تەحنيكالىق جانە كاسىبي ءبىلىم بەرۋ جۇيەسىن رەفورمالاۋ قاجەت ەكەنىن تاپسىرامىن. سونداي-اق، ءبىز جۇمىسشى ماماندىقتارىن دارىپتەۋ ارقىلى قوعامدا ەڭبەكقور جانە ناعىز مامان بولۋ يدەياسىن ناسيحاتتايمىز، – دەگەن ەدى ەل پرەزيدەنتى. قالامىزداعى بايىرعى وقۋ ورىندارىنىڭ ءبىرى – «الماتى ءسان جانە قىزمەت كورسەتۋ سالاسى كوللەدجىندە» «جۇمىسشى ماماندىقتار جىلىنا» وراي «تىگىن ءوندىرىسى جانە كيىمدەردى ۇلگىلەۋ» ماماندىعى بويىنشا 10 قۇزىرەتتىلىك ورتالىعى اشىلدى.
– ءبىزدىڭ باستى ماقساتىمىز – نارىقتا سۇرانىسقا يە مامانداردى دايارلاۋ. ساپالى مامان دايارلاۋ ءۇشىن الەۋمەتتىك سەرىكتەستەر شەڭبەرىن كەڭەيتىپ، WorldSkills ستاندارتتارى بويىنشا مامانداردى دايارلاۋ ءۇشىن ماتەريالدىق- تەحنيكالىق بازانى جاڭارتىپ، ونى ءتيىمدى پايدالانىپ، شىعارماشىلىق باستامانى دامىتساق دەيمىز، – دەيدى كوللەدج باسشىسىنىڭ ورىنباسارى كۇنىماي وماروۆا.
بۇل كۇندە اتالمىش كوللەدجدىڭ شەبەرحانالارى مەن زەرتحانالارى زاماناۋي قۇرىلعىلارمەن تولىقتاي جابدىقتالعان. ماسەلەن، «جاس مامان» جوباسى اياسىندا ساتىپ الىنعان جابدىقتارمەن وتە ساپالى ونىمدەر شىعارۋعا بولادى. سونىڭ ءبىر دالەلى، كوللەدج تىگىنشىلەرى تىككەن ونىمدەر ماسكەۋدەگى «ەتنو ەراتو» ەۋرازيالىق بايقاۋىنا جانە دۋبايدا وتكەن «Emirates Fashion Week» ساندىك كوللەكسيالار شەرۋىنە قاتىستى. جاقىندا كوللەدج ماماندارى يتاليادا «تىگىن ءوندىرىسى» باعىتى بويىنشا حالىقارالىق تاعىلىمدامادان ءوتىپ، بىلىكتىلىكتەرىن شىڭداپ قايتتى.