كوپتەگەن ەلدە، سونىڭ ىشىندە قازاقستاندا دا، جۇكتى ايەلدەرگە كوروناۆيرۋس جۇقتىرماۋ ءۇشىن قاتاڭ وقشاۋلاۋ رەجيمى ۇسىنىلادى. الايدا ەلىمىزدە بولاشاق انالار اراسىندا اۋرۋ تىركەلىپ جاتىر. الماتى قالالىق №2 پەرزەنتحانانىڭ باس دارىگەرى ورىنباسارىنىڭ مىندەتىن اتقارۋشى نازگۇل يمانعالييەۆا COVID-19 ايەلدىڭ دەنساۋلىعى مەن جۇكتىلىگىنە قالاي اسەر ەتەتىنى تۋرالى ايتىپ بەردى، دەپ حابارلايدى almaty-akshamy.kz inform.kz سىلتەمە جاساپ.
دارىگەردىڭ ايتۋىنشا، كوروناۆيرۋس ينفەكسياسى - وتە كۇردەلى جانە كوپتەگەن قيىندىعى بار اۋرۋ. «جۇكتى ايەلدەر، بارلىق ادامدار سياقتى، كوروناۆيرۋس جۇقتىرۋى مۇمكىن. كوپ جاعدايدا بۇل ينفەكسيا اناعۇرلىم اۋىر وتەدى. COVID-19 وكپەگە اسەر ەتەدى، ميدىڭ گيپوكسيالىق جاعدايى داميدى. قان ۇيىپ، اسقىنادى. جۇكتى ايەلدەر ءۇشىن ينفەكسيا ايتارلىقتاي ءقاۋىپتى، جاتىرداعى نارەستەگە دە اسەر ەتۋى مۇمكىن»،- دەيدى دارىگەر. سونىمەن قاتار، ول ەگەر جوتەل پايدا بولىپ، دەنە قىزۋى كوتەرىلسە، بىردەن دارىگەرگە قارالۋ كەرەكتىگىن باسا ايتتى.
«اۋرۋدىڭ ءجيى كەزدەسەتىن كلينيكالىق كورىنىستەرى - دەنە قىزۋىنىڭ كوتەرىلۋى، جوتەل، بۇلشىق ەتتەردىڭ اۋىرۋى، السىزدىك، قۇسۋ، جۇرەك اينۋى. بۇعان قوسا، شارشاۋ، ديارەيا، ەنتىگۋ جانە تاماق اۋرۋى ءجيى كەزدەسەدى. اۋرۋدىڭ كلينيكالىق كورىنىسى جرۆي-گە ۇقساس. ەگەر وسىنداي بەلگىلەر پايدا بولسا، بىردەن "جەدەل جاردەم" شاقىرىپ، دارىگەرگە قارالۋ قاجەت»،- دەيدى نازگۇل يمانعالييەۆا.
سپيكەردىڭ سوزىنشە، جۇكتى ايەلدەر بارلىق ساقتىق شارالارىن قاتاڭ ساقتاۋلارى ءتيىس.
«اۋرۋدىڭ الدىن الۋ ءۇشىن جەكە گيگيەنا ەرەجەلەرىن ساقتاۋ كەرەك. اتاپ ايتار بولسام، قولدى ءجيى-جيى سابىنمەن جۋۋ قاجەت. ماسكانى ۇنەمى تاعىپ جۇرگەن ابزال. ادام كوپ شوعىرلاناتىن جەرلەردەن اۋلاق بولىپ، بۇقارالىق شارالاردان باس تارتۋ قاجەت. جۇكتى ايەلدەر ۆيرۋستان ازىرگە تەك وسىلاي عانا قورعانا الادى. سەبەبى، بىزدە اياعى اۋىر كەلىنشەكتەرگە ۆاكسينا سالىنبايدى»، - دەپ قورىتىندىلادى ءسوزىن الماتى قالالىق № 2 پەرزەنتحانا باس دارىگەرى ورىنباسارىنىڭ مىندەتىن اتقارۋشى نازگۇل يمانعالييەۆا.