جۇك كەمەسى قاق ورتاسىنان ءبولىنىپ قالدى

ودەسسادان تۇركياعا بەت العان Pallada جۇك كەمەسى قارا تەڭىزدەگى داۋىل كەزىندە جاعاعا شىعىپ، كەمە قاق ورتاسىنان ەكىگە ءبولىنىپ قالعان.

وقيعا ورنىنان تۇسىرىلگەن كادرلار ب ا ق پەن الەۋمەتتىك جەلىلەردە جاريالاندى، دەپ حابارلايدى Almaty-akshamy.kz

Milliyet تۇرىك باسىلىمىنىڭ جازۋىنشا، جۇك كەمەسى تۇركيانىڭ سولتۇستىگىندەگى زونگۋلداك پروۆينسياسىنىڭ ەرەگلي ايماعىنا قاراي جىلجىپ، جاعاسىنا جاقىنداعان. اپات كەزىندە تولقىننىڭ بيىكتىگى شامامەن 5 مەترگە جەتكەن. بورتتا 13 ادامنان تۇراتىن ەكيپاج بولعان. ەكيپاج مۇشەلەرى ەۆاكۋاسيالانعان جانە ولاردىڭ اراسىندا زارداپ شەككەندەر جوق.

«19 قاراشادا ساعات 10:00-دە باس ىزدەستىرۋ جانە قۇتقارۋ جۇمىستارىن ۇيلەستىرۋ ورتالىعىنا اپات تۋرالى قوڭىراۋ ءتۇستى. تەكسەرۋدەن كەيىن كامەرۋن تۋى بار Pallada كەمەسى داۋىل سالدارىنان زاقىمدانىپ، ەرەگليدە سۋ جاعاسىنا شىعىپ قالعانى انىقتالدى. ءبىزدىڭ ورتالىقتىڭ كومەگىمەن كەمەدەگى بارلىق 13 ەكيپاج مۇشەسى ەۆاكۋاسيالاندى»، - دەلىنگەن تۇركيانىڭ تەڭىز ىستەرى باس باسقارماسىنىڭ حابارلاماسىندا.

تۇركيانىڭ Anadolu اگەنتتىگىنىڭ حابارىنشا، ەرەگلي پورتىنىڭ باسشىلىعى داۋىلعا بايلانىستى پورتتان شىعىپ كەتكەن Kafkametler اتتى تۇرىك كەمەسىمەن بايلانىس ورناتۋعا تىرىسۋدا. ول رەسەيدەن شىعىپ تۇركيانىڭ يزمير قالاسىنا قاراي جول تارتقان. بۇل كەمەدە 12 ەكيپاج مۇشەسى بار، بارلىعى تۇركيا ازاماتتارى.