ەلىمىزدە پسيحياترلارعا كومەككە جۇگىنەتىندەر كوبەيدى. ستاسيونارلاردا پاسيەنت كوپ.
جۇيكەسى جۇقارعان جۇرتتىڭ باسىم بولىگى استانا قالاسى مەن اباي، شىعىس قازاقستان وبلىستارىندا تىركەلگەن، دەپ حابارلايدى aqshamnews.kz
مامانداردىڭ ايتۋىنشا، پسيحيكالىق دەنساۋلىققا بەي-جاي قاراۋعا بولمايدى. سالدارى اۋىر بولۋى مۇمكىن.
رەسمي مالىمەتتەرگە قاراساق، ەلىمىزدە بيىل پسيحياتريالىق ستاسيونارلاردىڭ جۇمىسى 12 پايىزعا ارتقان. جارتى جىلدا وسى سالاداعى مامانداردىڭ قىزمەت كورسەتۋىنە 14 ملرد تەڭگە جۇمسالعان.
ەلدە 202 مىڭنان استام ادام پسيحيكالىق اۋرۋمەن دارىگەر باقىلاۋىندا. ولاردىڭ باسىم بولىگىنە "پسيحيكالىق دامۋى تەجەلگەن" دياگنوزى قويىلعان. ناۋقاستاردىڭ كوبى استانا قالاسى مەن اباي جانە شىعىس قازاقستان وبلىستارىندا تىركەلگەن.
"بيىل 1-قازانعى ستاتيستيكانى الساق، 202 مىڭ ادامنان استامى ديناميكالىق باقىلاۋدا تۇردى. بۇل دەگەنىمىز 3،1 پايىزعا ادام سانى ءوستى دەگەن ءسوز. ق ر بويىنشا، وڭىرلەردە ءبىز 1-شىلىك اۋرۋشاڭدىلىقتى ايتۋىمىز كەرەك. بۇ جەردە ەڭ ءبىرىنشى ورىندا استانا قالاسى تۇر. استانادا شامامەن 100 مىڭ ادامعا شاققاندا 110 ادامعا تەڭ. كەلەسى اباي وبلىسى، شامامەن 70 ادام"، -دەدى ق ر دسم "رەسپۋبليكالىق پسيحيكالىق دەنساۋلىق عىلىمي-پراكتيكالىق ورتالىعى"باس ديرەكتورىنىڭ ورىنباسارى ءنابي ەسىموۆ.
پسيحياترلار دا سوڭعى ۋاقىتتا شاعىمداناتىن ناۋقاستاردىڭ كوبەيگەنىن ايتادى. كۇيزەلىسكە تۇسكەندەردىڭ ءتۇرلى دەڭگەيى بار. ادام بىرنەشە اپتا ەشنارسەگە زاۋقى بولماي، مىنەز-قۇلقىنىڭ قاتتى وزگەرگەنىن بايقاسا، پسيحولوگقا نەمەسە پسيحياترعا قارالۋى كەرەك. ايتپەسە، بەيساناداعى پروسەستەر اسقىنىپ، پسيحولوگيالىق پاتولوگيالىق اۋرۋلارعا اكەلۋى ابدەن مۇمكىن دەيدى ماماندار.
"كوڭىل كۇيىنىڭ بۇزىلۋى، پوۆەدەنيە دەيمىز، مىنەز-قۇلقىنىڭ وزگەرۋىنە بايلانىستى جۇگىنىپ جاتقان ناۋقاستار بار. وسىنداي جاعداي 2 اپتادان اسىپ بارا جاتسا، مىندەتتى تۇردە پسيحياتر مامانىنا جۇگىنۋ كەرەك"، -دەيدى پسيحياتر انار تاستەمبەكوۆا.
ال الەۋمەتتانۋشىلاردىڭ ايتۋىنشا، پسيحولوگتارعا كوبىنە ورتا جاستاعى ازاماتتار مەن جاستار ءجيى جۇگىنەدى ەكەن. قوعامداعى بۇل وزگەرىستىڭ سەبەپتەرىن دە اتاپ ءوتتى.
"الەۋمەتتىك جەلىلەردىڭ اسەرىنەن كوپ ادامدا جاقسى ءومىر سۇرۋگە دەگەن ۇمتىلىس بايقالادى. ءوزىن ءوزى دامىتۋ دەگەن، بىلاي ايتقاندا بۇل قاجەتتىلىك پا نەمەسە ول ترەندپەن كەلگەن نارسە ما، ءبىراق ادامداردىڭ بارلىعى سول باعىتتا دامۋدا. وڭىرلەردە ول نارسە ازداپ كەزدەسەدى. سەبەبى ول جاقتا ماماندار دا از. ءوز ينستاگرامىن جۇرگىزىپ جاتقان ەكسپەرتتەر دە از"،- دەدى الەۋمەتتانۋشى ايگەرىم جاقىپبەك.
مەنتالدى بۇزىلۋعا – الەۋمەتتىك جەلىگە تاۋەلدىلىك، ەكونوميكالىق قيىندىقتار، مادەني وزگەرىستەر، ءتىپتى جاھاندىق داعدارىس تا سەبەپ دەيدى ماماندار. الەمدە سترەسستىڭ جوعارى دەڭگەيىنىڭ دە اسەرى بار.