قازاقستاندا جرۆي بويىنشا ەپيدجاعداي تۇراقتالىپ كەلەدى، دەپ حابارلايدى اqshamnews.kz ءتىلشىسى دەنساۋلىق ساقتاۋ مينيسترلىگى سانيتاريالىق-ەپيدەميولوگيالىق باقىلاۋ كوميتەتىنە سىلتەمە جاساپ.
ۆەدومستۆو مالىمەتىنشە، كەيىنگى اپتادا جەدەل رەسپيراتورلىق ۆيرۋستىق ينفەكسيانىڭ (جرۆي) 198 532 جاعدايى تىركەلگەن. بۇل الدىڭعى اپتامەن سالىستىرعاندا 1،7 ەسە تومەن.
ەپيدماۋسىم باستالعالى بەرى 2 295 ادامنىڭ تۇماۋمەن اۋىرعانى زەرتحانالىق تۇردە راستالدى. ال تۇماۋعا قارسى 2 268 891 ادامعا ۆاكسينا سالىنعان، بۇل رەسپۋبليكا حالقىنىڭ شامامەن 11 پايىزىنا تەڭ.
قازىرگى تاۋلىككە دەيىنگى جاعداي بويىنشا 269 مەكتەپتەگى 25 850 وقۋشى قاشىقتان وقۋ فورماتىنا اۋىستىرىلعان. كوميتەت دەرەگىنشە، ءبىر تاۋلىك ىشىندە قاشىقتان وقۋعا جىبەرىلگەن وقۋشىلار سانى 73،5 پايىزعا، ال قاشىقتان وقۋعا اۋىسقان مەكتەپتەر سانى 40 پايىزعا ازايعان.
سانيتاريالىق-ەپيدەميولوگيالىق باقىلاۋ كوميتەتى جرۆي مەن تۇماۋدىڭ الدىن الۋ شارالارىن قاتاڭ ساقتاۋدى ەسكە سالدى. اتاپ ايتقاندا:
-
سىرقات ادامدارمەن قاتىناستى شەكتەۋ، ناۋقاستاردى وقشاۋلاۋ؛
-
ادامدار كوپ جينالاتىن ورىندارعا بارماۋ، جابىق بولمەلەردە ماسكا تاعۋ؛
-
جوتەلگەندە جانە تۇشكىرگەندە اۋىز بەن مۇرىندى سالفەتكامەن جابۋ؛
-
ءۇي-جايدى جانە جۇمىس ورىندارىن تۇراقتى تۇردە جەلدەتۋ؛
-
قولدى ءجيى ءارى مۇقيات جۋۋ ۇسىنىلادى.