مارات قارابايەۆ قازاقستان اۋماعى ارقىلى شەتەل كولىكتەرى كوپ وتەتىنىن حابارلادى.
اقىلى جولدار نەگە كوبەيەتىنىن كولىك ءمينيسترى ءتۇسىندىردى، دەپ حابارلايدى Almaty-akshamy.kz
كولىك ءمينيسترى مارات قارابايەۆ ۇكىمەت وتىرىسىنان كەيىنگى بريفينگتە قازاقستان اقىلى جولدار سانىن كوبەيتۋ تۋرالى شەشىمدى نەلىكتەن قابىلداعانىن ءتۇسىندىردى.
"ولار قازاقستاننىڭ جولدارىن پايدالانعانى ءۇشىن اقى تولەۋى كەرەك. وتاندىق اۆتوتاسىمالداۋشىلارعا كەلسەك، ەگەر ادام اقىلى جولدىڭ جاقىن ايماعىندا تۇرسا، كولىك ءنومىرى جالپى مالىمەتتەر بازاسىنا ەنگىزىلەدى. اي سايىنعى تولەم نەبارى 1000 تەڭگە بولادى. ال ۇلكەن جۇك كولىكتەرىندە ابونەنت تولەم جۇيەسى بار"، - دەپ ءتۇسىندىردى مينيستر.
قازاقستانداعى جولداردىڭ جالپى ۇزىندىعى - 96 مىڭ شاقىرىم. بۇل رەسپۋبليكالىق جانە جەرگىلىكتى ماڭىزى بار اۆتوموبيل جولدارى. ونىڭ 3،2 مىڭ شاقىرىمى عانا اقىلى جولدار.
"اقىلى جۇيە ءبىرىنشى كەزەكتە ترانزيت جولدارعا ەنگىزىلىپ جاتىر. ءبىزدىڭ جولدار جاقسى بولعانىن قالايمىز. ولاردى كۇتىپ ۇستاۋ ءۇشىن قاراجات كەرەك. ونى رەسپۋبليكالىق بيۋدجەتتەن، ازاماتتاردىڭ قالتاسىنان ەمەس، سول كولىكتەردەن الامىز. جولدى پايدالانعانى ءۇشىن اقى الامىز. نەگە بالاما جولى جوق؟ ويتكەنى مۇنداي جولداردى سالۋعا ەكى ەسە كوپ قارجى كەرەك. ەگەر بالاما جولدار قاراستىرساق، بۇل بيۋدجەتكە وراسان زور سالماق بولادى. بيۋدجەت سالىق تولەۋشىلەردىڭ ەسەبىنەن قالىپتاسادى. سوندىقتان بيۋدجەتكە تۇسەتىن جۇكتەمەنى ازايتۋعا باعىتتالعان"، - دەدى كولىك ءمينيسترى.
28 قاراشادا ق ر كولىك ءمينيسترى مارات قارابايەۆ ەلدەگى اقىلى اۆتوموبيل جولدارى جەلىسىن كەڭەيتۋ جوسپارى تۋرالى ايتتى.