ەلىمىزدىڭ ءبىرقاتار وڭىرىندە سىقىرلاعان سارشۇناق اياز بولىپ، اقتۇتەك بوران سوعىپ تۇر. وسىعان بايلانىستى كەيبىر وڭىرلەردە جولدار جابىلدى.
"قاراعاندى-استانا" تاس جولىنىڭ بويىندا جولدا قالعان وزبەكستان ازاماتتارى قۇتقارىلدى. سارىاعاشتان ەلورداعا قاراي شىققان اۆتوبۋس استاناعا جەتپەي سىنعان. كولىكتە بولعان 20 شاقتى جولاۋشى قۇتقارىلدى. ءتارتىپ ساقشىلارى ولاردى وساكاروۆ اۋدانىنا دەيىن جەتكىزىپ، جاتىن ورىن ىشەر تاماقپەن قامتاماسىز ەتتى.
"جەكسەنبى كۇنى ساعات كەشكى سەگىزدە اۆتوبۋسپەن جۇردىك. وزبەكستان ازاماتىمىز. بىزگە ىستىق تاماق بەردى، جاتىن ورىنعا ورنالاستىردى. ءبىز 25 ادام ەدىك، 8 ادام قاراعاندىدا ءتۇستى. 17ء-مىز وسىندامىز"، -دەيدى وزبەكستان رەسپۋبليكاسىنىڭ ازاماتى ابۋباكىر حايتوۆ.
قىزىلوردالىق پوليسەيلەر اۋا-رايىنىڭ قولايسىزدىعىنا بايلانىستى سوڭعى ءبىر تاۋلىكتە 15 جۇرگىزۋشىگە كومەك كورسەتتى. اۋا رايى كۇرت سۋىتىپ، بوران سوعىپ جولدا قالىپ قويعان. كەيبىرىنىڭ جاعارمايلارى قاتىپ قالعان. ايتا كەتۋ كەرەك، "قورقىت اتا" اۋەجايى دا رەيستەردىڭ كەشىگۋى مۇمكىن ەكەندىگىن جولاۋشىلارعا ەسكەرتتى.
تۇركىستان وبلىسىندا قاتتى بوران سالدارىنان جولدا قالعاندار قۇتقارىلدى. ايماقتا ءقازىر اۋى رايىنىڭ كۇرت سۋىتۋىنا بايلانىستى مەكتەپتەردىڭ باسىم كوپشىلىگى قاشىقتان ءبىلىم الۋعا كوشكەن. "شىمكەنت–تاراز" اۆتوجولى جانە تۇلكىباس اۋدانىندا ىشكى جولدار جابىلعان. وسى كۇرەجول بويىندا قالعان ءۇش بىردەي تويوتا الفارد كولىگىنىڭ جۇرگىزۋشىلەرى مەن جولاۋشىلارى قۇتقارىلعان. ال بايدىبەك اۋدانىندا كەشەدەن بەرى بۇرقاسىن جەل تۇرىپ، اياز بولدى. سالدارىنان تۇركىستان وبلىسى بايدىبەك پەن تۇلكىباس اۋداندارىنىڭ اۋماعى، باتىس-ەۋروپا باتىس-قىتاي تراسساسى مەن وعان قوسىلاتىن ەلدى مەكەندەر جولدارى جابىلدى. بۇل اۋماقتاردان دا بىرنەشە جەڭىل كولىك قار قۇرساۋىنان شىعارىلىپ، اقتۇتەكتە اداسىپ كەتكەن شوپان دا تابىلدى.
اقمولا وبلىسىندا قاتتى ايازدا جولدا قالعان 31 ادام كوكشەتاۋ قالاسىنداعى جىلىتۋ پۋنكتىنە جەتكىزىلدى. ولاردىڭ ەكەۋى بالا. بارلىعى تاجىكستان رەسپۋبليكاسىنىڭ ازاماتتارى. ايتا كەتەيىك، قازىرگى تاڭدا وڭىردە كۇن كۇرت سۋىتتى. اۋا تەمپەراتۋراسى -37 گرادۋسقا دەيىن تومەندەدى.