ەلىمىزگە العاشقى جولبارىستار 2025 جىلى اكەلىنبەك
29 شىلدە – حالىقارالىق جولبارىستار كۇنى. وسىعان وراي، ەكولوگيا، گەولوگيا جانە تابيعي رەسۋرستار مينيسترلىگىنىڭ قوعاممەن بايلانىس دەپارتامەنتىنىڭ ديرەكتورى ولجاس بەركىنباي ۇلى الەۋمەتتىك جەلىدە جولبارىستار جونىندە دەرەكتەرمەن ءبولىستى، دەپ حابارلايدى Almaty-akshamy.kz.
ول حح عاسىردىڭ باسىندا جەر بەتىندە جولبارىستىڭ 9 ءتۇرى مەكەندەپ، سانى 100 مىڭنان اسسا، ءححى عاسىردىڭ باسىندا شامامەن 3،5 مىڭى قالعانىن ايتتى. سونداي-اق تۇران جولبارىستارىنىڭ سوڭعى وكىلدەرى 1970 جىلدارى جوعالىپ كەتكەنىن اتاپ ءوتتى.
«قازىرگى تاڭدا ەكولوگيا، گەولوگيا جانە تابيعي رەسۋرستارى مينيسترلىگى بالقاش ماڭىندا جولبارىس پوپۋلياسياسىن قالپىنا كەلتىرۋدىڭ 15 جىلعا ارنالعان باعدارلاماسىن جاسادى. ول اڭنىڭ مەكەن ەتۋ ورتاسىن دايىنداۋ، جولبارىستى تابيعاتقا جىبەرۋ جانە باعدارلامانىڭ جۇزەگە اسۋىن باقىلاۋ شارالارىن قامتيدى»، - دەپ جازدى ول.
بەركىنبايەۆتىڭ ايتۋىنشا، 2018 جىلى «ىلە-بالقاش» رەزەرۆاتى قۇرىلىپ، وندا بيوتەحەنيكالىق شارالار ارقىلى قابان، قۇلان، قاراقۇيرىقتاردى كوبەيتۋ، بۇقار بۇعىلارىنىڭ پوپۋلياسياسىن قالپىنا كەلتىرۋ جۇمىستارى ءجۇرىپ جاتىر. وسى اتالعان شارالار ورىندالعاننان كەيىن ەكوجۇيە جولبارىس پوپۋلياسياسىن ۇستاپ تۇرۋعا قابىلەتتى بولماق.
«2010 جىلى قازاقستان حالىقارالىق جولبارىس سامميتىندە ورتالىق ازياعا تۇران جولبارىستارىن قايتارۋعا دايىن ەكەنىن مالىمدەگەن. ال 2017 جىلى قازاقستان مەن بۇكىلالەمدىك جابايى تابيعات قورى (WWF) وڭتۇستىك بالقاش ماڭى مەن ىلەنىڭ دەلتا اۋدانىندا جولبارىستىڭ رەينسترودۋكسياسى باعدارلاماسىن جۇزەگە اسىرۋ تۋرالى مەموراندۋمعا قول قويىلدى. ەلىمىزگە العاشقى جولبارىستار 2025 جىلى اكەلىنبەك»، - دەپ حابارلادى ول.