Air Astana ەرەكشە سەرۆيستىڭ ارقاسىندا ۇزدىك اۋەكومپانيا بولىپ تانىلدى، وسىعان دالەل Skytrax World Airline سىيلىعىنىڭ "ورتالىق ازيا مەن تمد-داعى ۇزدىك اۋەكومپانيا" ءۇشىن ون ءبىرىنشى ماراپاتى.
وسى اۆياسيالىق وسكاردى ماراپاتتاۋ ءراسىمى بۇگىن پاريجدەگى اۆياسالوندا ءوتتى. سونداي-اق، اۋەتاسىمالداۋشى ەكىنشى رەت "اۋەكومپانياداعى ۇزدىك قىزمەت كورسەتۋ" ءۇشىن ماراپاتقا يە بولدى. Air Astana 2011 جىلى العاشقى Skytrax سىيلىعىن جەڭىپ الدى جانە سودان بەرى جىل سايىن ءتۇرلى نوميناسيالار بويىنشا جەڭىمپاز اتاندى.
Skytrax World Airline Awards 1999 جىلى قۇرىلعان جانە الەمدىك اۋەكومپانيالار اراسىندا بەدەلدى ماراپات بولىپ سانالادى. جەڭىمپازدار 100-دەن استام ۇلتتىڭ ساياحاتشىلارىنىڭ ونلاين-ساۋالناماسىنىڭ ناتيجەلەرى بويىنشا انىقتالادى. ساۋالناما اعىلشىن، فرانسۋز، يسپان، ورىس، جاپون جانە جۇڭگو تىلدەرىندە جۇرگىزىلەدى. جىل سايىن 300-دەن استام حالىقارالىق اۋەكومپانيا باعالانادى.
"Air Astana 2023 جىلى جولاۋشىلار تاراپىنان قوس ماراپاتقا يە بولعانىن ماقتان تۇتا الادى. اۋەكومپانيا وسكەلەڭ باسەكەلەستىگى بار ايماقتاعى اۋە تاسىمالداۋشىسىنىڭ كوشباسشىلىعىن كورسەتەتىن ەكى نوميناسيادا جەڭىسكە جەتتى"، - دەپ اتاپ ءوتتى Skytrax-تىڭ باس ديرەكتورى ەدۆارد پلەيستەد.
"Air Astana قۇرىلعان كۇننەن باستاپ جولاۋشىلاردى قاناعاتتاندىرۋ ءۇشىن ستاندارتتاردى ۇنەمى جەتىلدىرە وتىرىپ، قىزمەت كورسەتۋ ستاندارتتارىنىڭ جوعارى دەڭگەيىن بەلگىلەدى. قانداي جاعداي بولماسىن، ءبىزدىڭ ۇشۋ قاۋىپسىزدىگى مەن جولاۋشىلارىمىزدىڭ جايلىلىعىن قامتاماسىز ەتۋ بويىنشا قاعيداتىمىز وزگەرىسسىز قالادى"، - دەپ ءتۇسىندىردى Air Astana كومپانيالار توبىنىڭ پرەزيدەنتى پيتەر فوستەر. "ون ءبىرىنشى رەت " ورتالىق ازيا مەن تمد – نىڭ ۇزدىك اۋەكومپانياسى " رەتىندە تانىلۋ-بۇل ءبارىمىز ماقتان تۇتاتىن جەتىستىك. مەن جولاۋشىلارىمىزعا سەنىم مەن تاڭداۋ ءۇشىن، سونداي-اق ارىپتەستەرىمىزگە قۇندىلىقتارىمىزعا ادالدىعى ءۇشىن العىس ايتامىن".