پويىزدار مەن ۇشاقتار جانە اۆتوبۋستار قالىپتى دەڭگەيدە جولاۋشىلار تاسىمالىن قامتاماسىز ەتۋدە
بۇل تۋرالى يندۋستريا جانە ينفراقۇرىلىمدىق دامۋ مينيسترلىگى مالىمدەدى، دەپ حابارلايدى Almaty-akshamy.kz.
«سوڭعى كۇندەرى رەسەي ازاماتتارىنىڭ كورشىلەس مەملەكەتتەرگە جاپپاي كوشۋى قوعام اراسىندا ۇلكەن رەزونانس تۋدىرۋدا. الەۋمەتتىك جەلىلەردە شەكارالىق وتكىزۋ بەكەتتەرىندەگى قالىڭ ءنوپىر مەن ۇزىن-سونار كەزەك جايىنداعى ءتۇرلى اقپاراتتار تارالۋدا. اتالعان جازبالارداعى پىكىرلەرگە قاراعاندا بۇل ماسەلە وتانداستارىمىزدىڭ ەرەكشە نازارىن اۋدارىپ وتىر. ءوز تاجىريبەمنەن بىلەتىندەي، ەرتە مە، كەش پە – بۇقارالىق اقپارات قۇرالدارى وكىلدەرى تاراپىنان يندۋستريا جانە ينفراقۇرىلىمدىق دامۋ مينيسترلىگىنە وسى ماسەلە تۋراسىندا كوپتەگەن جۋرناليستىك ساۋالدار ءتۇسۋى مۇمكىن. سەبەبى، ءبىزدىڭ ۆەدومستۆو اۆتوموبيل، تەمىر جول جانە اۋە كولىگى ارقىلى جولاۋشىلار تاسىمالىنا جاۋاپتى»، - دەلىنگەن حابارلامادا.
مينيسترلىكتىڭ مالىمەتىنشە، بۇگىندە ەلىمىزدىڭ بارلىق كولىك ينفراقۇرىلىمى شتاتتىق رەجيمدە جۇمىس ىستەپ جاتىر. پويىزدار مەن ۇشاقتار جانە اۆتوبۋستار قالىپتى دەڭگەيدە جولاۋشىلار تاسىمالىن قامتاماسىز ەتۋدە.
«رەسپۋبليكالىق ماڭىزى بار كولىك جولدارىنداعى قازىرگى جاعداي مەن ونداعى قوزعالىس قارقىندىلىعى دا الدىڭعى اپتالارداعىداي قالىپتى دەڭگەيدە. سونداي-اق ج. ومارحان تاسىمالداۋ سىيىمدىلىعىن ارتتىرۋ جانە رەيستەردىڭ كەشىگۋ سانىن ازايتۋ ماقساتىنداعى تاپسىرمانى ورىنداۋ شەڭبەرىندە وتاندىق اۋە پاركى تاعى ءبىر «Boeing-737» ۇشاعىمەن تولىققانى تۋرالى دا حابارلادى. بۇل SCAT اۆياكومپانياسىنىڭ سوڭعى ءبىر جارىم ايدا العان ءتورتىنشى «Boeing» اۋە كەمەسى. سىيىمدىلىعى 189 ورىندىقتى قۇرايتىن اۋە كەمەسى اۆياكومپانيا پاركىندەگى ۇشاقتار سانىن 30-عا دەيىن ارتتىردى. بيىلعى جىلدىڭ سوڭىنا دەيىن قازاقستاننىڭ ازاماتتىق اۆياسيا فلوتى تاعى دا 10 اۋە بورتىمەن تولىعادى دەپ جوسپارلانىپ وتىر»، - دەلىنگەن حابارلامادا.