الماتىدا 310 ەرەكشە بالانىڭ قاتىسۋىمەن ۇلتتىق ينكليۋزيۆتى ويىندار وتكىزىلەدى، دەپ حابارلايدى Almaty-akshamy.kz.
«جۇلدىزاي» ۇلتتىق ينكليۋزيۆتى ويىندارى بالۋان شولاق اتىنداعى سپورت سارايىندا جانە الماتى قالاسىنىڭ ورتالىق ستاديونىندا 2022 جىلعى 26-30 قىركۇيەك ارالىعىندا سپورتتىڭ 6 ءتۇرى بويىنشا وتەدى: «شاعىن فۋتبول»، «ۇستەل تەننيسى»، «جەڭىل اتلەتيكا»، «گولبول»، «بوچچا»، «بەس تاس» جانە «اسىق اتۋ» ۇلتتىق ويىندارى. قاتىسۋشىلار سانى 310 بالا.
«جۇلدىزاي» ويىندارى ق ر مادەنيەت جانە سپورت مينيسترلىگىنىڭ «ق ر 2022 جىلعى سپورتتىق-بۇقارالىق ءىس-شارالاردىڭ ءبىرىڭعاي كۇنتىزبەلىك جوسپارىنا» ەندى. ويىن جەڭىمپازدارى حالىقارالىق جارىستارعا قاتىسىپ، سپورتتىق رازريادتار الا الادى.
بيىلدان باستاپ «جۇلدىزاي» ۇلتتىق ينكليۋزيۆتى ويىندارىنا اينالعان «جۇلدىزاي» سپارتاكياداسى ەلىمىزدەگى ەرەكشە ءبىلىم بەرۋ قاجەتتىلىكتەرى بار 10-18 جاس ارالىعىنداعى بالالار مەن جاسوسپىرىمدەر قاتىساتىن جالعىز كاسىبي سپورتتىق جارىستار بولىپ تابىلادى.
«جۇلدىزاي» كورپوراتيۆتىك قورى كوپ جىلدار بويى ەرەكشە بالالاردىڭ ءومىرىن جاقسارتۋعا، شىعارماشىلىق جانە سپورتتىق قابىلەتتەرىن دامىتۋعا باعىتتالعان شىعارماشىلىق، سپورتتىق، مەديسينالىق جانە الەۋمەتتىك جوبالاردى جۇزەگە اسىرىپ كەلەدى.
سالاۋاتتى ءومىر سالتىن قالىپتاستىرۋ جانە ناسيحاتتاۋ، دامۋ مۇمكىندىگى شەكتەۋلى بالالاردى سپورتقا تارتۋ، ولاردى الەۋمەتتەندىرۋ جانە قوعامعا ينتەگراسيالاۋ، ينكليۋزيۆتى سپورتتى دامىتۋ ءۇشىن سپورتتىق ينفراقۇرىلىمدى قۇرۋ جانە نىعايتۋ ءبىزدىڭ جاستار ءۇشىن ينكليۋزيۆتى ويىنداردى وتكىزۋدىڭ نەگىزگى ماقساتتارى بولىپ تابىلادى.
«جۇلدىزاي» ۇلتتىق ينكليۋزيۆتى ويىندارىنىڭ باس سەرىكتەستەرى بولىپ BI Group قۇرىلىس حولدينگى مەن "سامۇرىق-قازىنا" قورى تابىلادى. ينكليۋزيۆتى ويىنداردى وتكىزۋگە ق ر ۇلتتىق پاراليمپيادا كوميتەتى، الماتى قالاسىنىڭ اكىمدىگى، الماتى قالاسىنىڭ سپورت باسقارماسى، "Sport qory" قورى، وڭىرلەردىڭ اكىمدىكتەرى مەن سپورت تۇرلەرى بويىنشا فەدەراسيالار قولداۋ كورسەتتى.