ناۋرىز ايىنان جولاۋشىلار پويىزدارىنا تەكسەرۋ جۇمىستارى باستالادى.
"تالگو" جولاۋشىلار پويىزدارىن باقىلاۋ كۇشەيتىلەدى، دەپ حابارلايدى Almaty-akshamy.kz يندۋستريا جانە ينفراقۇرىلىمدىق دامۋ مينيسترلىگىنىڭ كولىك كوميتەتىنە سىلتەمە جاساپ.
ناۋرىز ايىنان جولاۋشىلار پويىزدارىنا تەكسەرۋ جۇمىستارى باستالادى. ول جىلجىمالى قۇرام جاساقتالاتىن پۋنكتەردە جۇزەگە اسىرىلادى.
سوڭعى ءۇش جىلدا Patentes Talgo S.L. كومپانياسىنىڭ جۇردەك پويىزدارىندا تەحنيكالىق ۆاگوندار 3 رەت ورتەنگەن. وعان سەبەپ - جىلجىمالى قۇرام يەلەرىنىڭ ورتكە قارسى قاۋىپسىزدىك ەرەجەلەرىن ساقتاماۋى.
"بىلتىر يندۋستريا جانە ينفراقۇرىلىمدىق دامۋ مينيسترلىگى كولىك كوميتەتىنىڭ اۋماقتىق بولىمشەلەرى ءورت قاۋىپسىزدىگىنىڭ تالاپتارىن بۇزعان 100-دەن استام فاكتىنى انىقتاعان. 2 ميلليون تەڭگەدەن استام اكىمشىلىك ايىپپۇل سالىنىپ، وندىرىلگەن"، - دەپ مالىمدەدى مينيسترلىك.
كولىكتىك باقىلاۋ ورگاندارى "ارشالى – انار" ۋچاسكەسىندە پەتروپاۆل – الماتى باعىتىنداعى جولاۋشىلار پويىزىنىڭ تەحنيكالىق ۆاگونىنداعى ءورتتىڭ شىعۋىنا بايلانىستى Patentes Talgo S.L. جولاۋشىلار پويىزدارىنا پروفيلاكتيكالىق باقىلاۋ جۇمىستارىن كۇشەيتۋدى ۇيعاردى. تەكسەرۋ ناتيجەسى جاريالانادى.
اقاۋى بار ۆاگوندار رەيسكە شىعارىلمايدى. تەمىرجول كولىگىمەن جولاۋشىلاردى تاسىمالداۋ سالاسىندا قانداي دا ءبىر ورەسكەل كەمشىلىكتەر بايقالسا، مينيسترلىكتىڭ كولىك كوميتەتىنە قاراستى ورتالىقتىڭ +77080880800 نەمەسە 98-35-35 ءنومىرى بويىنشا سەنىم تەلەفونىنا حابارلاسىپ، ءتيىستى اقپاراتتى جەتكىزۋگە بولادى.