ەل تاۋەلسىزدىگىنىڭ 30 جىلدىعىنا ەرەكشە سىي جاسالدى
اتىراۋدا جولاۋشى تاسىمالداۋشىلار قۇرمانعازىنىڭ «اداي» كۇيىن ورىندادى، دەپ حابارلايدى Almaty-akshamy.kz قازاقپارات-قا سىلتەمە جاساپ.
اتىراۋ قالالىق اكىمدىگىنىڭ باسپا ءسوز قىزمەتىنەن ءمالىم ەتكەندەي، مۇنداي شەشىم ەل تاۋەلسىزدىگىنىڭ 30 جىلدىعىنا وراي قابىلدانعان.
«قالا تۇرعىندارى مەن قوناقتارى 16 جانە 17 جەلتوقسان كۇندەرى بارلىق باعىتتا قاتىنايتىن قوعامدىق كولىكتە تەگىن جۇرەدى. جولاۋشى تاسىمالداۋ ءۇشىن كۇن سايىن 220 اۆتوبۋس مارشرۋتقا شىعادى. ەكى كۇن بويى تەگىن ءجۇرۋ مۇمكىندىگىن جاس ەرەكشەلىگىنە قاراماستان بارلىق جولاۋشى پايدالانا الادى»، - دەپ حابارلادى اكىمدىكتىڭ باسپا ءسوز قىزمەتى.
ال، جولاۋشى تاسىمالداۋشى كومپانيالاردىڭ قىزمەتكەرلەرى ەل تاۋەلسىزدىگىنىڭ 30 جىلدىعىنا ەرەكشە سىي جاسادى. «اتىراۋاۆتوپارك» جانە «العابۋس» ءجشس-نىڭ بىرلەسۋىمەن «قازاعىمنىڭ قازىناسى – قارا دومبىرا» ءىس-شاراسىن وتكىزدى. اتالعان سەرىكتەستىكتەردىڭ 30 قىزمەتكەرى ءبىر مەزگىلدە دومبىرامەن قۇرمانعازىنىڭ «اداي» كۇيىن ورىندادى.