"FlyArystan" اۋە كومپانياسىنىڭ استانا - وسكەمەن باعىتى بويىنشا رەيسىندە جولاۋشى ستيۋاردەسسانى ۇرىپ، ۇشاقتىڭ ۇشۋىن كەيىنگە قالدىرۋعا سەبەپ بولدى، دەپ حابارلايدى aqshamnews.kz
وقيعا ساعات 17:20 شاماسىندا ورىن الدى، ناتيجەسىندە رەيس بىرنەشە ساعاتقا كەيىنگە شەگەرىلدى. ارتىنان رەيستىڭ كەلەسى كۇنگە اۋىستىرىلعانى بەلگىلى بولدى.
وقيعا كۋاگەرى، جۋرناليست ازامات ەرگالييەۆتىڭ ايتۋىنشا، 50 جاس شاماسىنداعى ەر ادام بورتپروۆودنيك قىزدى ۇرىپ، اۋىرسىنۋدان جيىرىلىپ وتىرعانىن كورگەن. ستيۋاردەسسانى اكەتكەن سوڭ، ەر ادام باسقا جولاۋشىلارمەن دە جانجال شىعارعان. كەيىن پوليسيا كەلىپ، ەر ادامدى الىپ كەتتى. بارلىق جولاۋشىلار ۇشاقتان شىعارىلدى.
ترانسپورتتاعى پوليسيا مالىمەتتەرى بويىنشا، 47 جاستاعى ەر ادام ماس كۇيىندە ستيۋاردەسسانى ىشىنەن ۇرعان، جانە ۇشاقتان شىعىپ بارا جاتقاندا "بومبا" دەپ ايقايلاپ، پانيكا تۋعىزعان. اۋە كەمەسىنىڭ تەكسەرىسى ناتيجەسىندە جارىلعىش زاتتار تابىلماعان. ەر ادامعا بۇزاقىلىق ارەكەت جانە جالعان تەرروريزم تۋرالى حابارلاما ءۇشىن قىلمىستىق ءىس قوزعالدى. قازىرگى ۋاقىتتا ول يزولياتورعا قامالعان.