«قازجولعزي» اق وقۋ ورتالىعى جولشىلاردىڭ ءبىرىڭعاي بىلىكتىلىك بازاسىن تولتىرۋ ءۇشىن دەرەك جيناۋ جۇمىستارى باستالعانىن جاريالادى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
جولشىلاردىڭ ءبىرىڭعاي بىلىكتىلىك بازاسى – سالالىق ەڭبەك بيرجاسى نەمەسە مامانداردىڭ سيفرلىق قورى. بىلىكتىلىك بازاسى ارقىلى مەردىگەر ۇيىمدار ونلاين رەجيمدە جولداردى جوبالاۋ، ولاردىڭ قۇرىلىسى جانە قايتا قۇرۋ ءۇشىن قاجەت مامانداردى تابا الادى. جول قۇرىلىسشىلارى وزدەرىنىڭ كاسىبي قۇزىرەتتەرىن دامىتۋعا ىنتالى بولادى. ويتكەنى، اتالعان بازادا ولاردىڭ داعدىلارى مەن وقىتۋ كۋرستارىنان وتكەندىگىن راستايتىن سەرتيفيكاتتار قولجەتىمدى بولماق.
«بىلىكتىلىك بازاسىندا اۆتوجول ماماندارىنىڭ ساناتى، ءوتىلى، داعدىلارى مەن سەرتيفيكاتتارى تۋرالى مالىمەتتەر ساقتالادى. ءبىزدىڭ بولجامىمىز بويىنشا، بۇل بازانىڭ كومەگىمەن بىلىكتى كادرلاردىڭ جەتىسپەۋشىلىگى سياقتى پروبلەمانى شەشە الامىز»، – دەيدى «قازجولعزي» اق وقۋ ورتالىعىنىڭ ديرەكتورى گۇلجامال وماروۆا.
ينستيتۋت سايتىندا جول قۇرىلىسى ماماندىعىن يگەرگەن جوو تۇلەكتەرى سىندى بولاشاق ماماندار مەن قازىرگى ينجەنەرلەر، شەبەرلەر، جوبالاۋشىلار تۋرالى ءارى باسقا دا مالىمەتتەر جينالا باستادى.
«ينستيتۋتتىڭ سايتىندا دەرەكتەردى جيناۋ تۋرالى حابارلاندىرۋمەن بىرگە، ءبىز جول سالاسىندا وقيتىن ستۋدەنتتەر، ەڭبەك ەتەتىن قىزمەتكەرلەر مەن كومپانيالار ساۋالناماعا قاتىسىپ، دەرەكتەردى تولتىرۋعا مۇمكىندىك الاتىن سىلتەمە جاريالادىق. جالپى، سيفرلىق بازا ەڭبەك نارىعىن تالداۋعا مۇمكىندىك بەرەدى»، – دەدى «قازجولعزي» اق سيفرلاندىرۋ باسقارماسىنىڭ باسشىسى قۇرمانعازى تىلەۋ.
ەستەرىڭىزگە سالا كەتەيىك، 2022 جىلدىڭ جەلتوقسانىندا «قازجولعزي» اتالعان جۇيەنىڭ جوباسىن جاساپ، اۆتورلىق قۇقىق العان بولاتىن.