اۆتوجول قۇرىلىسىنىڭ ءاربىر باعىتى ءۇشىن وقۋ باعدارلاماسىن دايىنداۋدا.
"قازجول" عىلىمي-زەرتتەۋ ينستيتۋتىنىڭ ماماندارى اۆتوجول قۇرىلىسىن جوعارى وقۋ ورىندارىندا وقىتۋ ماسەلەسىمەن اينالىسىپ جاتىر، دەپ حابارلايدى Almaty-akshamy.kz Inbusiness.kz سىلتەمە جاساپ.
قازىرگى تاڭدا "قازجولعزي" ساراپشىلارى بۇل سالا بويىنشا ازىرلەنىپ جاتقان جاڭا زاڭ جوباسىنا ءوز ۇسىنىستارىن ەنگىزگەن. وعان سايكەس اۆتوجول ماماندارى ءوز بىلىكتىلىكتەرىن ارتتىرۋعا مىندەتتى بولادى.
"ءبىز جول سالاسى ماماندارىنىڭ بىلىكتىلىگىن ارتتىرۋ مىندەتىن زاڭنامالىق دەڭگەيدە بەكىتۋدى قالايمىز. دايىندالىپ جاتقان زاڭ جوباسىنا ءتيىستى ۇسىنىستار ەنگىزىلدى. دامىعان ەلدەردە كومپانيا قىزمەتكەرلەرىنىڭ بىلىكتىلىگى ولاردىڭ بەدەلىنە، رەيتينگىنە جانە باسقا دا فاكتورلارعا اسەر ەتەدى. قازاقستانعا دا وسىنداي جۇيە قاجەت"، - دەيدى "قازجولعزي" اق پرەزيدەنتى ارمان الىبايەۆا.
اقپاراتقا سايكەس، عىلىمي ينستيتۋت ەلىمىزدىڭ جوعارى وقۋ ورىندارىمەن ءبىرقاتار مەموراندۋمعا قول قويدى. "قازجولعزي" ارقىلى قازاقستاندىق ستۋدەنتتەر ناقتى زەرتحانالار مەن ۋچاسكەلەردە تاجىريبە جيناي الادى. سونىمەن قاتار ماماندار اۆتوجول قۇرىلىسىنىڭ ءاربىر باعىتى ءۇشىن وقۋ باعدارلاماسىن دايىنداۋدا.
جول سالاسىنا قاتىستى ماسەلەلەر "Kaztraffic-2022" 18ء-شى حالىقارالىق كورمەسى اياسىندا ءوتىپ جاتقان "جول قۇرىلىسىنداعى جاڭا تەحنولوگيالار" كونفەرەنسياسى بارىسىندا تالقىلاندى.