جقجك جوبالارى ءتورت نەگىزگى باعىتقا بولىنگەن.
قازاقستاندا جۇمىسپەن قامتۋدىڭ 2020-2021 جىلدارعا ارنالعان جول كارتاسى شەڭبەرىندە ورتاشا جالاقىسى 91 مىڭ تەڭگە بولاتىن 7،8 مىڭ جۇمىس ورنى قۇرىلدى، دەپ حابارلايدى Almaty-akshamy.kz.
رەسمي مالىمەت بويىنشا، قازىرگى ۋاقىتتا جقجك اياسىندا 175 ينفراقۇرىلىمدىق جوبادا قۇرىلىس جۇمىستارى جۇرگىزىلۋدە، تاعى 25ء-ى ىسكە اسىرۋدىڭ باستاپقى كەزەڭىندە تۇر.
«جقجك اياسىندا 2021 جىلى بارلىق باعىتتار بويىنشا 40،9 مىڭ جۇمىس ورنى قۇرىلادى، ونىڭ 28،3 مىڭنان استامى تۇراقتى جۇمىس ورىندارى بولادى. جۇمىس ىزدەپ جۇرگەن قازاقستاندىقتار تۇرعىلىقتى جەرى بويىنشا حالىقتى جۇمىسپەن قامتۋ ورتالىقتارىنا بارۋ ارقىلى جقجك شەڭبەرىندە ينفراقۇرىلىمدىق جوبالاردى ىسكە اسىرۋعا قاتىسا الادى»، – دەلىنگەن ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتىنىڭ حابارلاماسىندا.
حالىقتى جۇمىسپەن قامتۋ ورتالىقتارى ۋاقىتشا تىركەلگەن ادامداردى قوسا العاندا، جۇمىسپەن قامتۋ ورگاندارىندا جۇمىس ىزدەپ جۇرگەن ادامدار، جۇمىسسىزدار رەتىندە تىركەلگەندەر، سونداي-اق جۇمىستان بوساتىلاتىن ادامدار، جالاقىسى ساقتالمايتىن دەمالىستا جۇرگەن ادامدار، ستۋدەنتتەر قاتارىنان قاجەتتى بىلىكتىلىگى بار مامانداردى ىرىكتەيدى جانە ولاردى ينفراقۇرىلىمدىق جوبانى ىسكە اسىراتىن جۇمىس بەرۋشى-مەردىگەرگە جىبەرەدى.
حجقو ارقىلى ينفراقۇرىلىمدىق جوبالارعا جۇمىسقا ورنالاستىرۋ كەزىندە جۇمىسسىز جاستارعا، NEET ساناتىنداعى جاستارعا، سونداي-اق دەنساۋلىعىنا زيان كەلتىرمەيتىن جانە وقۋ پروسەسىن بۇزبايتىن جۇمىستاردا ستۋدەنتتەرگە باسىمدىق بەرىلەدى.
حجقو قاجەت بولعان جاعدايدا ينفراقۇرىلىمدىق جوباعا جۇمىسقا ورنالاستىرۋعا كەپىلدىك بەرە وتىرىپ، ءتيىستى جۇمىستاردى ورىنداۋ ءۇشىن جۇمىس بەرۋشى-مەردىگەردىڭ/قوسالقى مەردىگەردىڭ وتىنىمدەرى بويىنشا كادرلاردى قايتا دايارلاۋدى قامتاماسىز ەتەدى.
حجقو باعىتتارى بويىنشا جۇمىسقا ورنالاسقانداردىڭ جالاقى مولشەرى سالىقتاردى، الەۋمەتتىك تولەمدەردى جانە ەكولوگيالىق ۇستەمەاقىلار بويىنشا تولەمدەردى ەسەپكە الماعاندا، پايدالانىلماعان ەڭبەك دەمالىسى ءۇشىن وتەماقىنى ەسكەرە وتىرىپ، ەڭ تومەنگى جالاقىنىڭ كەمىندە ەكى مولشەرى (83 مىڭ تەڭگە) دەڭگەيىندە بەلگىلەنەدى.